BİR ƏSGƏRİN TANRI DUASI.
Ulu tanrım!
Müqəddəslər, müqəddəsi
Bir şərəfli vuruş üçün
Uğur dilə, yol ver mənə!
Babaların cürətini,
qüdrətini al ver mənə,
Düşmənimə hiddətlərin
Hiddətini al ver mənə,
Qanım axsa,
Sən üstəlik qanımı ver,
Canım getsə, canımı ver.
Al ruhumu qanadlandır,
Damarımı palıdlandır,
Bədənimi poladlandır.
Kipriyimi oxa döndər.
Qollarımı lülə elə,
Barmağımı güllə elə,
Şər üstümə yeriyəndə,
Düşmən məni hərləyəndə,
Çarpanağa döndər məni.
Qanım axan bir torpağa-
Al bayrağa döndər məni.
Zərrə olum, qəlpə olum,
Düşmənimə qoy yenidən
zərbə olum.
Qorxaq nədi, əsgər nədi,
“Bəlkə” nədir, “məgər” nədi,
Bu ki, vətən yürüşüdü,
Bu ki, qeyrət vuruşudu.
Bu ki, namus döyüşüdü.
Qurban gedən oğul varsa
Ana yurdun bu, sabahla görüşüdü.
Əsgər nədi, qorxaq nədi,
Verdim nədi, torpaq nədi?!
Bu, muqəddəs bir ölümlə
Millətini diriltməkdi,
Bu, səngəri suvarmaqdı,
Bu, torpağı göyərtməkdi,
Qanım vuruş, canım vuruş,
qolum vuruş!
Torpaq nədi, verdim nədi
bircə qarış...
Əsgər nədi, səngər nədi,
geri nədi?!
Vətən yoxsa, torpaq yoxsa
Yaşamağın yeri nədi?!
Ulu Tanrim!
Sən şərəfli ölümlərə
Öyrət məni.
Sonra, sonra,
Torpağımın sabahında
Öz qanımdan göyərt məni!
Musa Yaqub