AMEA A.A.Bakıxanov adına Tarix və Etnologiya İnstitutunun Qarabağ müharibəsinin tarixi və Böyük Qayıdış hərəkatı şöbəsinin baş elmi işçisi tarix elmləri doktoru Nazim Məmmədovun Almaniyada “Heydər Əliyev və Qarabağın inkişaf strategiyası” (“Heydar Aliyev and the development strategy of Karabakh (late 1960s – early 1980s)” kitabı nəşr olunub.

İnstitutdan TƏHSİL.BİZ -ə bildirilib ki, “STELLA” nəşriyyatında çap edilən kitabın elmi redaktoru A.A.Bakıxanov adına Tarix və Etnologiya İnstitutunun direktor müavini tarix elmləri doktoru, dosent İlqar Niftəliyev və Əliyevşünaslıq şöbəsinin müdiri tarix elmləri doktoru, dosent Ədalət Qasımovdur.

Kitabda Azərbaycanın ayrılmaz tərkib hissəsi olan Qarabağın 1960-cı illərin sonundan 1980-ci illərin əvvəllərinə qədər olan dövrü əhatəli şəkildə öyrənilir. XX əsrin 60-cı illərinin sonlarında Heydər Əliyevin respublika rəhbərliyinə gəlişi ilə Azərbaycanda idarəetmə sisteminin təkmilləşdirilməsi prosesi başlandı. Həmin dövr dövlətimizin beynəlxalq aləmdə nüfuzunun yüksəlməsi, milli dirçəlişin başlanması və Qarabağın sosial, iqtisadi və mədəni sahələrinin dinamik inkişafı ilə müşayiət olundu. Milli oyanışa şərait yaradan amillərin gücləndiyi bir şəraitdə 1970-ci illərdə Heydər Əliyev Ermənistanın Azərbaycana yeni əsassız ərazi iddialarının qarşısını qətiyyətlə aldı. Ümummilli Lider o dövrün digər mühüm məsələlərinin araşdırılması və təhlili ilə də məşğul olub. Kitabda digər mühüm məsələlər də təhlil və tədqiq edilib.