Özünümüdafiə hər bir canlıya xas xüsusiyyətlərdəndir. Dünya binə olandan güclü ilə gücsüz, xeyirlə şər qovğadadər.
Əslində zülm, dağıntılar, ölümlərlə sonuclanan müharibələrdən insanlar da, ölkələr də həmişə ziyan çəkir. Qarşıdurmalar zamanı qalib tərəf olmaqdan ötrü istər insan qrupları, istərsə də cəmiyyət zamanla müxtəlif vasitələr düşünmüşdür. Dövlət səviyyəsində isə bu ordu quruculuğudur ki, Azərbaycan dövləti də öz müstəqilliyini əldə etdikdən sonra güclü və nizamlı ordu yaradılmasına başlamış və hazırda ordumuz dünyanın əlli ən inkişaf etmiş ordusunun ön sıralarında yer alır. Birinci Qarbağ müharibəsi məğlubiyyətini yaşayan xalqımız torpaq itkiləri ilə heç vaxt barışmamış, lazım olduğu andaca döyüşlərə atılaraq doğma yurd yerlərini düşməndən azad etməyə hazır olmuşdur...
Ali Baş Komandan İlham Əliyevin bir əmri ilə azadlıq savaşına qalxan oğullarımız, damarında döyüşkən türk qanı axdığını haqq davamızda bir daha sübut etdi. Onlardan biri də Rzayev Elxan Ariz oğlu idi.
O, 1994-cü il, aprelin 15-də Qəzli kəndində dünyaya gəlmişdi. Orta təhsilini 2000-2011-ci illərdə B.Rəhimov adına Qəzli kənd tam orta məktəbində alan Elxan, orta məktəbi bitirərək Bakı Dövlət Kompyuter Kollecinə daxil olur. 2012-ci ildə həqiqi hərbi xidmətə çağırılanda təhsilini yarımçıq qoyaraq orduya gedir. Hərbi xidmətini Quru Qoşunlarının Tovuz rayonunda yerləşən “N” saylı hərbi hissəsində rabitəçi kimi yerinə yetirir, daim nizam-intizamı, səriştəsi ilə seçilən əsgər, 2014-cü ildə ordudan tərxis olunaraq Kollecdə təhsilini davam etdirməyə başlayır. 2016-cı ildə oranı müvəffəqiyyətlə başa vurur və 2017-ci ildən etibarən Qəzli kənd tam orta məktəbində müəllim kimi əmək fəaliyyətinə başlayır. Lakin vətənpərvər gənc aldığı biliklə kifayətlənmir, daim təhsilini artırmaq barədə düşünürdü. Bunun üçün o, 2019-cu il Ali məktəblərə qəbul imtahanlarında uğurla iştirak edərək Qazax Dövlət Universitetinə qəbul olunsa da, Universitetin qiyabi şöbəsi olmadığından təhsildən imtina ediir. 2020-ci ildə keçirilən qəbul imtahanlarında yenidən bəxtini sınayaraq Sumqayıt Dövlət Universitetinə qəbul olunur. Lakin bu dəfə də İkinci Qarabağ savaşının başlanması onun yolunu Universitet auditoriyasından deyil, cəbhədən salır...
29 sentyabr 2020-ci ildə müharibəyə yollanan Elxan Rzayev, Ağcabədi rayonunda hərbi təlimlər keçərək döyüşlərə qatılır. İlk dəfə Cəbrayıl uğrunda gedən şiddətli döyüşlər zamanı yaralanan Elxan, tibbi yardım göstərildikdən sonra döyüşə yenidən davam edir. 13 oktyabr günü, növbəti ağır döyüşə girməmişdən öncə valideynləri ilə görüşərək onlara Ordumuzun gücündən, hərbi qulluqçuların yüksək döyüş bacarıqlarından, döyüşlərdə göstərdikləri igidliklərdən həvəslə söz açır və müharibənin çox tez bir zamanda Azərbaycan ordusunun qələbəsi ilə bitəcəyini, özünün isə geriyə qalib kimi dönəcəyini inamla bildirir...
Ağır istehkamları,
Yarıb keçir Ordumuz.
Düşməni biçib yerə,
Sərib keçir Ordumuz...
Azərbaycanı canı bilən, üçrəngli Bayrağını isə həmişə uca tutan Elxan, komandanlığın bütün əmr və tapşırıqlarını həmişə həvəslə yerinə yetirir, vətənə xidmətdən qürur duyurdu. Oktyabr ayının 14-də Qudadlı istiqamətində gedən ağır və çətin döyüşlərə girən Elxan, düşmənin canlı qüvəsinin və hərbi texnikasının məhv edilməsində iştirak etmişdi. Qubadlının Çardaxlı kəndində gedən ağır döyüşlər isə təəssüf ki, onun üçün sonuncu olmuş, bu döyüşdə Elxan ağır yaralanaraq şəhidlik məqamına ucalmışdır. Qəzli kənd qəbristanlığında dəfn olunmuş şəhidin məzarı indi kənd camaatının, işlədiyi kollektivin və sevimli şagirdlərinin and yeridir. Ölümündən sonra igid döyüşçü Azərbaycan Respublikasının Prezidenti İlham Əliyevin sərəncamına əsasən “Vətən uğrunda”, “Cəbrayılın azad olunmasına görə”, “Qubadlının azad olunmasına görə” medalları ilə təltif edilmişdir...
...Ariz oğlundan danışdıqca kövrəlir, amma göz yaşalrını gizləməyə çalışır. Gözü hər tərəfdə yeganə oğlunu axtaran ata onun vətənpərvərliyindən, alicənablığından, geniş dünyagörüşlü olmasından həsrətlə söz açır: “Oğlumu bizim üçün heç kim əvəz edə bilməz, biz onunla fəxr edirik, başımızı uca elədi, vətən sevgisi bütün sevgilərdən ucadır, oğlum da Vətən yolunda canından keçdi. Şəhidlər Azərbaycan durduqca yaşayacaqlar. Vətən sağ olsun!”-deyir.
Elxan Rzayev bu kəndin İkinci Qarabağ savaşında qanı ilə tarix yazan yeganə şəhididir. Nişanlı idi, pandemiya bitəndən sonra toyu olacaqdı. Bir sevgi yolu beləcə başlamadan bitdi, neçə-neçə arzu yarımçıq qaldı, amma bir təsəllimiz var, o da otuz ilə yaxın işğal altında olan qədim torpaqlarımızın azadlığı, vətənimizin ərazi bütövlüyünün bərpa olunmasıdır.
Şəhidlər Allaha ismarlanan duadır, onlar ruha çevrilərək Vətən göylərində yenə də bu yurdun keşiyindədirlər..
Mia.az
