AMEA-nın Mərkəzi Elmi Kitabxanası (MEK) fonda yeni daxil olan Azərbaycan dövlətçiliyinə dair informasiya resurslarının virtual sərgisinin ikinci buraxılışını təqdim edib.

MEK-dən TƏHSİL.BİZ-ə bildirilib ki, Azərbaycan, rus və ingilis dillərində təqdim olunan nəşrlərdə Azərbaycan xalqının Ümummilli Lideri, müasir müstəqil Azərbaycan dövlətinin memarı və qurucusu Heydər Əliyevin dövlətçilik, ordu quruculuğu, təhsil, kitab mədəniyyəti, iqtisadiyyat, ekologiya, dünya azərbaycanlıları, siyasət, diplomatiya, liderlik və digər sahələrə dair verdiyi töhfələr, mühüm hadisə və tarixi faktlar yer alır.

Sərgidə “Dünya və Azərbaycan siyasətində Heydər Əliyev kursu”, “Zülmətdə doğan günəş: sənədli tarixi roman”, “Heydər Əliyev: müdrik fikirlər. İyun 1993 – 1998 Oktyabr. I kitab”, “Heydər Əliyev. 100 faktın tarixi”, “Heydər Əliyev İli: nəşrlər və tədbirlər : kataloq”, “Heydər Əliyev: dünya sivilizasiyasında elit şəxsiyyət”, “Heydər Əliyev: dil, ədəbiyyat və incəsənət”, “Heydər Əliyev və Azərbaycan mərasim mədəniyyəti”, “Ulu Öndərin işığında”, “Azərbaycan mədəniyyətində Heydər Əliyev fenomeni” və digər nəşrlər yer alıb.

Geniş oxucu kütləsi üçün nəzərdə tutulan nəşrlərin elektron versiyalarını “mek.az” saytına daxil olaraq elektron kitabxana bölməsindən yükləmək və ya onlayn rejimdə mütaliə etmək mümkündür.