Qazaxıstanın ESGQ Reytinq Agentliyinin direktoru Yerlik Karacan Nizami Gəncəvi adına Milli Azərbaycan Ədəbiyyatı Muzeyini ziyarət edib.

Muzeydən TƏHSİL.BİZ -ə bildirilib ki, ziyarətçiyə daha çox dahi Azərbaycan şairi Nizami Gəncəvi irsinə ayrılmış ekspozisiya maraqlı olub. Qonaq Nizami Gəncəvi irsi, həmçinin “Xəmsə”si əsasında işlənmiş sənət əsərləri, xalçalar və digər əyani vəsaitlərlə yaxından maraqlanıb.

Yerlik Karacan muzeyin rəylər və təəssüratlar kitabında Ədəbiyyat Muzeyindən böyük zövq aldığını qeyd edib.

Qonağa Ədəbiyyat Muzeyinin nəşrlərindən rus dilində “Məhsəti Gəncəvi. Portret-oçerk”, ingilis dilində “Şirvan şairləri” və “Nizami muzeyinin xalçaları” kitabları hədiyyə olunub.

Qeyd edək ki, Yerlik Karacan Qazaxıstanın aparıcı universitetlərində dünya iqtisadiyyatı və beynəlxalq biznesdən dərs deyib və bir sıra iqtisadi tədqiqatlarda iştirak edib. O, COP29 çərçivəsində keçirilən tədbirlərdə iştirak etmək üçün Azərbaycanda səfərdə olub.