İsmayıllı Rayon Təhsil Şöbəsinə rəhbərlik etmiş Fərman Bəşirovun xatirəsinə ailəsi tərəfindən təsis edilmiş "Bəşirov" mükafatı növbəti dəfə rayonun ən yüksək nəticə göstərərək universitetlərə qəbul olan 3 məzununa təqdim edilib.

TƏHSİL.BİZ xəbər verir ki, mükafatı məzunlara İsmayıllı Rayon Təhsil Sektorunun müdiri Rəşid Məmmədov və Bəşirovlar ailəsini təmsil edən İsmayıllı şəhər 6 nömrəli tam orta məktəbin direktoru Qalib Bəşirov təqdim edib. 
2024-cü il üzrə I yerə Təzəkənd kənd tam orta məktəbinin məzunu Bədəlova Nərgiz Cəlal qızı (685,1 bal), II yerə Diyallı kənd tam orta məktəbinin məzunu Qaniyev Elgün Elçin oğlu (670,5 bal), III yerə isə Diyallı kənd tam orta məktəbinin məzunu Göyüşov Namaz Veyis oğlu (670,4 bal) layiq görülüb. 
2020-ci ildə təsis olunan "Bəşirov" mükafatının I yer üzrə qalibinə 500 manat, II yerin qalibinə 300 manat, III yerin qalibinə isə 200 manat təqdim edilir.