Bu gün Bakı Dövlət Universitetinin (BDU) Hüquq fakültəsinin təşkilatçılğı ilə “Azərbaycan Respublikasında insan alverinə qarşı və narkotik vasitələrin və psixotrop maddələrin qanunsuz dövriyyəsinə qarşı mübarizənin aktual problemləri” mövzusunda onlayn elmi-praktiki seminar keçirilib. Seminar Azərbaycan Resplikasında insan alverinə qarşı mübarizəyə dair 2020-2024-cü illər üçün milli fəaliyyət planı və narkotik vasitələrin, psixotrop maddələrin və onların prekursorlarının qanunsuz dövriyyəsinə və narkomanlığa qarşı mübarizəyə dair 2019-2024-cü illər üçün Dövlət Proqramı çərçivəsində baş tutub.
Virtual tədbir iştirakçılarını salamlayan Hüquq fakültəsinin dekanı Əmir Əliyev rektor Elçin Babyevin seminarın işinə uğurlar arzuladığını diqqətə çatdıraraq mövzunun əhəmiyyətindən danışıb. Ölkəmizdə insan alverinə qarşı mübarizə istiqamətində məqsədyönlü tədbirlərin həyata keçirildiyini, antinarkotik təbliğata xüsusi önəm verildiyini, həyata keçirilən tədbirlər nəticəsində narkotiklərlə mübarizə sahəsində müsbət nəticələr əldə edildiyini, eləcə də təhsil müəssisələrində yeniyetmə və gənclərin məlumatlandırılması üçün davamlı olaraq maarifləndirmə işlərinin aparıldığını qeyd edib. Dekan bildirib ki, Azərbaycanda insan alverinə qarşı mübarizə sahəsində kompleks tədbirlər görür, ölkəmizin bu sahədə təcrübəsi bir sıra digər ölkələr üçün nümunədir. Azərbaycan insan alverinə qarşı mübarizə sahəsində ardıcıl və məqsədyönlü siyasət həyata keçirir.
Daha sonra Kriminalistika və məhkəmə ekspertizası kafedrasının müdiri Kamil Səlimov “Narkotik vasitələrin və psixotrop maddələrin qanunsuz dövriyyəsi ilə mübarizınin regional problemləri”, Cinayət hüququ və kriminologiya kafedrasının müdiri Şəhla Səmədova “Azərbaycan Respublikasının cinayət hüqu-qunda narkotik vasitələrin və psixotrop maddələrin qanunsuz dövriyyəsinə görə məsuliyyətin problemləri”, Azərbaycan Respublikası Dövlət Təhlükə-sizliyi Xidmətinin Heydər Əliyev adına Akademiyasının dosenti Mehparə Fətullayeva “Köləlik və İnsan alveri ilə mübarizədə beynəlxalq hüququn yeri və rolu”, Cinayət prosesi kafedrasının müdiri Firuzə Abbasova “Azərbaycan Respublikasının “İnsan alverinə qarşı mübarizə haqqında” Qanundakı cinayət prosessual hüquq normaları haqqında”, Azərbaycan Respublikasının Ədliyyə Akademiyasının baş müəllimi Mətanət Əsgərova “İnsan alveri cinayətinin anlayışının təkmilləşdirilməsi məsələləri”, Kriminalistika və məhkəmə ekspertizası kafedrasının dosenti Rəna Quliyeva “İnsan alverinə qarşı mübarizənin təkmilləşdirilməsi yolları”, Azərbaycan Dəmir Yolu Qapalı Səhmdar Cəmiyyətində şöbə rəisi İnsan hüquqları və informasiya hüququ YUNESKO kafedrasının müəllimi Əlövsət Allahverdiyev “İnsan alverinə qarşı mübarizənin beynəlxalq-hüquqi əsasları”, Azərbaycan Respublikasının Daxili İşlər Nazirliyinin İdarə rəisinin müavini Elnur Aslanov “İnsan alveri və məcburi əməklə mübarizənin əsas aspektləri” mövzusunda məruzə ilə çıxış ediblər.
Çıxışlarda narkomaniya, narkobiznes və ona qarşı mübarizə, Azərbaycan Respublikasının narkomaniya və narkobiznesə qarşı mübarizədə həyata keçirdiyi tədbirlər, narkomanlığın cəmiyyətə və insan sağlamlığına ziyanı, bu sahədə görülən tədbirlər və onların nəticələri, məcburi əməyin və insan alverinin qarşısının alınması, onun potensial qurbanlarının müəyyən edilməsi, uşaq əməyinə dair müvafiq beynəlxalq konvensiyalar, insan alverinə qarşı mübarizəyə dair elmi tədqiqatların aparılmasının təmin edilməsi, narkomanlığın ilkin profilaktikası, antinarkoloji təbliğat və maarifləndirmə istiqamətində həyata keçirilən tədbirlərin səmərəliliyinin artırılması haqqında ətraflı məlumat verilib. Qeyd edilib ki, narkotiklərin qanunsuz dövriyyəsi və narkomanlıq, insan alveri bu gün ictimaiyyəti, tutduğu vəzifədən, ictimai mövqeyindən, yaşından asılı olmayaraq hər bir vətəndaşı ciddi düşündürməli və narahat etməlidir. Son illər ərzində Azərbaycanın insan alveri ilə mübarizə sahəsi üzrə ikitərəfli və çoxtərəfli formatda xarici ölkələrlə, o cümlədən BMT, BMqT, ATƏT, İslam Əməkdaşlıq Təşkilatı, Avropa Şurası kimi bir sıra beynəlxalq təşkilatlarla əməkdaşlıq etdiyi vurğulanıb.