Noyabrın 28-də Azərbaycan Respublikasının Prezidenti yanında Dövlət İdarəçilik Akademiyasında (DİA) Türkiyə Respublikasının Yurtdışı Türkler və Akraba Topluluklar Başkanlığının (YTB) sədri Abdulhadi Turus və onu müşayiət edən nümayəndə heyətinin iştirakı ilə görüş keçirilib.
DİA-nın rektoru, akademik Urxan Ələkbərov tədbiri açaraq qonaqları salamlayıb və görüşün məqsədi, əhəmiyyəti barədə məlumat verib. Rektor qeyd edib ki, qlobal çağırışların artdığı bir dövrdə dövlət idarəçiliyində yeni yanaşmaların öyrənilməsi və tətbiqi xüsusi əhəmiyyət kəsb edir. O, həmçinin Azərbaycan və Türkiyə Respublikasının dövlət idarəçiliyi sahəsindəki təcrübələrinin bir-birini tamamladığını və bu istiqamətdə əməkdaşlığın iki ölkə arasında qarşılıqlı faydalı nəticələr verə biləcəyini vurğulayıb.
Görüş zamanı YTB-nin sədri Abdulhadi Turus geniş məruzə ilə çıxış edib. O, Türkiyənin diaspora siyasətinin əsas istiqamətləri, konseptual çərçivəsi və strateji hədəfləri barədə ətraflı məlumat verib. Turus bildirib ki, YTB-nin fəaliyyəti yalnız xaricdə yaşayan türklərin dəstəklənməsi ilə məhdudlaşmır, həm də qardaş xalqlar arasında akademik və mədəni əlaqələrin gücləndirilməsinə xidmət edir. O, YTB-nin təqaüd proqramları, gənclər təşəbbüsləri, mədəni layihələri və akademik mübadilə proqramlarının gələcək illərdə daha da genişləndiriləcəyini qeyd edərək DİA-nın bu əməkdaşlıq çərçivəsində mühüm rol oynadığını vurğulayıb.
Elm və beynəlxalq əlaqələr üzrə prorektor, professor Elvin Əzizbəyov bildirib ki, DİA Türkiyənin aparıcı universitetləri və elmi qurumları ilə birgə layihələrin icrasını davam etdirir. O, qarşıdakı illərdə bu əməkdaşlığın daha da genişləndirilməsi, elm və təhsil mövzularında konfransların təşkili, yeni doktorantura proqramlarının yaradılması və müasir akademik tədris istiqamətlərinin tətbiqi kimi təşəbbüslərin nəzərdə tutulduğunu vurğulayıb.
Tədbir çərçivəsində təhsil proqramlarının dəstəklənməsi, eləcə də mədəni, sosial və akademik sahələrdə mümkün əməkdaşlıq perspektivləri müzakirə olunub.
Sonda professor-müəllim heyəti qonaqlara öz suallarını ünvanlanıb, görüş xatirə fotosu ilə yekunlaşıb.
