“Azərbaycan Memarlıq və İnşaat Universiteti aylardır bizdən aldığı məhsulların ödənişini etməkdən boyun qaçırır”.
Bu şikayətlə “Qafqazinfo”ya “Florya Tekstil” MMC şirkətinin direktoru Taleh Ocaqov müraciət edib.
Direktorun iddialarına görə, universitet tekstil məhsullarını qəbul etsə də, ödənişi gecikdirir: “Bu ilin iyunun 26-da AZMİU tərəfindən “Yumşaq inventarın yaradılması” müsabiqəsi elan edilib. Və bu müsabiqədə nəzarət orqanının qərarı ilə “Florya Tekstil” MMC rəsmi qalib elan olunub. Sentyabrın 29-da tərəflər arasında satınalma müqaviləsi bağlanıb. Malların nümunələri satınalan təşkilatın nümayəndəsi tərəfindən dəfələrlə baxılaraq “tam uyğun” təsdiqlənib. Oktyabrın 13-21 tarixlərində bütün məhsullar tam həcmdə təhvil verilib, qaimə-fakturalar rəsmiləşdirilib. Lakin bundan sonra nə təhvil-təslim aktı imzalanıb, nə mallar geri qaytarılıb, nə də ödəniş...”
T.Ocaqovun sözlərinə görə universitetin hazırda “Florya Tekstil” MMC-yə 10 min 35 manat borcu var: “Mallar universitetə təqdim olunan gün təhvil-təslim aktı tərəfimizdən hazırlanıb, təqdim edilib. Universitet nümayəndələri mallara baxış keçirib, lakin aktı “sonra imzalayacağıq” deyərək yola verib. Bununla yanaşı məhsullar faktiki olaraq qəbul edilib. Heç bir laboratoriya nəticəsi təqdim olunmayıb. Əksinə, rəsmi izahat tələb etdikdə məsul şəxs ünsiyyətdən yayınıb, zənglərə cavab verməyib, görüşlərdən boyun qaçırıb. Bu davranış təkcə bir şirkətə deyil, ümumən sahibkarlıq mühitinə yönəlmiş etinasızlıqdır.
Universitet rəhbərliyi məsələni həll etmir. Proses faktiki olaraq bloklanıb. Bu məbləğ dövlət universiteti üçün problem deyil, amma görünür ki, ödənişi etməmək üçün süni şəkildə maneələr yaradırlar”.
Şirkət direktoru, həmçinin qeyd edib ki, sözügedən məhsullar da universitetin tələbələri tərəfindən daşınıb.
İddialarla bağlı “Azərbaycan Memarlıq və İnşaat Universitetinə (AZMİU) sorğu ünvanladıq. AzMİU-nun mətbuat katibi Nicat Abdullayev bildirdi ki, şirkətin iddiaları rəsmi sənədlərlə təsdiq edilmiş satınalma prosedurunun faktiki gedişatı ilə uyğun gəlmir: “09.07.2025-ci il tarixində “Dövlət satınalmalarının vahid elektron portalı” üzərindən “Yumşaq inventarın alınması” adlı kotirovka sorğusu keçirilib, prosesdə dörd təchizatçı iştirak edib və ən aşağı qiymət təklifinə əsasən “Florya Tekstil” MMC qalib elan olunub. Satınalmanın nəticələrinə dair yekun protokol daha sonra Antiinhisar və İstehlak Bazarına Nəzarət Dövlət Agentliyinin AİBNDA/SQ-9681/2025 nömrəli, 25 sentyabr 2025-ci il tarixli qərarı ilə təsdiqlənib və bunun əsasında 29.09.2025-ci il tarixdə AzMİU ilə “Florya Tekstil” MMC arasında 09.29/2025 nömrəli müqavilə imzalanıb.
Müqavilə üzrə öhdəliklərin icrası zamanı şirkət tərəfindən təqdim edilən mallar kotirovka şərtlərində göstərilən müddətdən 10 gün gec və natamam şəkildə təhvil verilib, həmçinin məhsulların bir qismi sorğuda tələb olunan formal və keyfiyyət göstəricilərinə uyğun olmayıb. Bu pozuntular AzMİU-nun tender komissiyası tərəfindən rəsmi qaydada yoxlanılıb və sənədləşdirilib.
Qeyd olunan uyğunsuzluqların mövcudluğu malların qəbul aktının imzalanmasına imkan vermədiyindən, təhvil-təslim rəsmiləşdirilməyib, nəticə etibarilə məhsulların “qəbul olunması” və ödənişin həyata keçirilməsi üçün hüquqi əsas yaranmayıb. Buna görə də şirkətin “mallar qəbul edilib, saxlanılır, lakin ödəniş olunmur” iddiası fakt və hüquqi prosedurlarla ziddiyyət təşkil edir.
Uyğunsuzluqların mövcudluğu səbəbi ilə AzMİU 24.10.2025-ci-il tarixində tender komissiyası üzvlərinin iştirakı ilə müqavilənin ləğvi haqqında Akt tərtib edib və bütün komissiya üzvləri bu qərarı imzaları ilə təsdiq edib. Daha sonra universitet 31/686 nömrəli rəsmi məktubla Antiinhisar və İstehlak Bazarına Nəzarət Dövlət Agentliyinə müraciət edərək “Florya Tekstil” MMC ilə bağlanmış müqavilənin icrasının dayandırılması, müqaviləyə xitam verilməsi və müsabiqənin yenidən qiymətləndirilməsinə icazə verilməsini xahiş edib.
Antiinhisar və İstehlak Bazarına Nəzarət Dövlət Agentliyi AzMİU-nun müraciətini araşdıraraq fəaliyyət istiqamətinə uyğun şəkildə müvafiq qiymətləndirmə aparıb. Agentlikdən daxil olan cavab məktubunda bildirilib ki, təqdim olunan sənədlər və əsaslandırmalar nəzərdən keçirildikdən sonra müqavilə öhdəliklərinin icrasında aşkarlanmış uyğunsuzluqların hüquqi qiymət alması üçün prosesin qanunvericiliyə uyğun davam etdirilməsi məqsədəuyğundur.
Agentlik əlavə olaraq qeyd edib, ki, satınalma prosedurunda ədalətlilik, şəffaflıq və rəqabət prinsiplərinin qorunması üçün AzMİU tərəfindən müsabiqənin yenidən qiymətləndirilməsi barədə irəli sürülən təklifə etiraz edilmir və bu istiqamətdə qərar verilməsi satınalma təşkilatçısının səlahiyyətindədir.
Bundan sonra müqaviləyə xitam verilməsi haqqında protokol AzMİU tərəfindən rəsmi olaraq dövlət satınalmalarının vahid internet portalında yerləşdirilib və “Florya Tekstil” MMC-yə bildirilib.
Bildiririk ki, AzMİU-da satınalma prosesləri tam olaraq dövlət portalı üzərindən həyata keçirilir və hər bir addım qanunvericiliyin tələblərinə uyğun rəsmiləşdirilir. Universitet tərəfindən qəbul olunmayan və müqavilə şərtlərinə uyğun təqdim edilməyən məhsulların ödənişinin edilməməsi qanuni zərurətdir və bu məsələ heç bir halda ödənişdən yayınma kimi təqdim edilə bilməz. Hazırda məsələ ilə bağlı bütün materiallar toplanıb, hüquqi qiymətin verilməsi məqsədilə məhkəmə müstəvisində proses başlanıb”.
Fidan Etibar