AMEA-nın Memarlıq və İncəsənət İnstitutunun Memarlıq abidələrinin bərpası və qorunması problemləri şöbəsinin müdiri, memarlıq üzrə fəlsəfə doktoru Rahibə Əliyeva avqust ayında Goranboy rayonunda mövcud olan bir sıra abidələri tədqiq edib. Bu abidələrdən biri Goranboy rayonunun Meşəli kəndində yerləşən alban abidəsidir. Məbəd Meşəli (Mənəşli) kəndinin tarixi mərkəzində, meydanda yerləşir.

İnstitutdan "Tehsil.biz"ə bildirilib ki, abidə Nazirlər Kabinetinin 2001-ci ildə nəşr olunmuş “Abidələrin əhəmiyyət dərəcəsinə görə bölgüsü” kataloqunda yerli əhəmiyyətli abidə kimi qeydə alınıb. Düzbucaqlı plan quruluşlu, 3 nefli, bazilikalı dini tikilinin VI-XII əsrlərdə inşa olunması barədə məlumat verilsə də, abidənin VI əsrdə tikilərək, XII əsrdə bərpa olunduğu göstərilir.

Baş fasadın, qərb istiqamətdən əsas girişi şərqə, altara doğru, baş nef boyu istiqamətlənib. Bu giriş apostolun və digər din xadimlərinin girişi üçün nəzərdə tutulsa da, şimal giriş ibadətə gələn əhali üçün nəzərdə tutulub. Baş nef öz ölçüləri- eni və hündürlüyü ilə şimal və cənub neflərini üstələyir. Yan neflərin hündürlüyünün az olması, örtük konstruksiyasının maili həll olunmasına şərait yaradıb. Yan neflərin şərq divarları kiçik apsidalı otaqlarla tamamlanıb.

Tikinti materialı kimi qaya parçalarından və gil-kəc materialından yapışdırıcı kimi istifadə olunub. Tikilinin bir hissəsi aqlayla üzlənib. Şimal giriş qapısı üzərində və cinahlarda həkk olunmuş alban xaçları, ermənilərin bu kənddə yaşadıqları müddətdə təhrifə məruz qalıb.