Aprelin 15-də Azərbaycan Dövlət Pedaqoji Universitetində (ADPU) Elm və Təhsil Nazirliyinin (ETN) təşəbbüsü və Təhsilin İnkişafı Fondunun (TİF) dəstəyi ilə həyata keçirilən III “Maarifçi” tələbə-məzun təcrübə proqramı ilə bağlı infosessiya keçirib. 

Bu barədə universitetdən TƏHSİL.BİZ -ə məlumat verilib. Bildirlib ki, görüşdə ADPU-nun sosial və humanitar məsələlər üzrə prorektoru professor Fikrət Rzayev, müvafiq sturuktur rəhbərləri və tələbələr iştirak ediblər.

Görüşü giriş sözü ilə açan ADPU-nun Tədbirlərin təşkili və tələbələrlə iş şöbəsinin müdiri Turan Kərimli tələbələrə infosessiyanın mahiyyəti və əhəmiyyəti barədə məlumat verib.

Daha sonra “Maarifçi” tələbə-məzun təcrübə proqramının məzunları –  Təhsil Tələbə Krediti Fondunun Təhsil müəssisələri ilə iş şöbəsinin aparıcı mütəxəssisi Kifayət Lələzadə və Elm və Təhsil Nazirliyinin Vətəndaş müraciətləri ilə iş sektorunun əməkdaşı Fidan Fərzəliyeva tələbələrə proqrama qoşulma şərtləri, müraciət qaydaları, proqramın karyera inkişafı üçün faydaları barədə ətraflı məlumat veriblər. 

Qeyd edilib ki, “Maarifçi” tələbə-məzun təcrübə proqramının məqsədi elm və təhsil sahəsində insan resurslarının formalaşdırılması, praktik fəaliyyətlə tələbə və məzunların sahəvi bilik və bacarıqlarının artırılması, onların təhsil sahəsində müasir yanaşmaları öyrənmələri, həmçinin təhsil islahatlarının həyata keçirilməsi prosesinə dəstək olmaqdır. Ali təhsilin bakalavriat səviyyəsi üzrə müvafiq ixtisaslarda təhsil alan III və IV tədris ilinin tələbələri, magistratura səviyyəsində təhsil alan tələbələr, eləcə də son 3 il ərzində məzun olmuş şəxslər üçün nəzərdə tutulmuş proqram çərçivəsində iştirakçılar Elm və Təhsil Nazirliyinin Aparatı, tabe qurumları və regional təhsil idarələrində təcrübə keçmək imkanı əldə edəcəklər. Bu müddət ərzində tələbə və məzunlar nazirliyin struktur bölmələrində həyata keçirilən layihə və proqramlarda, müxtəlif mövzular üzrə təlimlərdə, eləcə də təcrübəli rəhbər şəxslərlə mentorluq proseslərində iştirak imkanı qazanacaqlar.

İnfosessiya tələbələri maraqlandıran sualların cavablandırılması ilə davam edib.