Bakı Dövlət Universiteti (BDU) Beynəlxalq Təhsilverənlər üçün İqlim Fəaliyyəti Şəbəkəsinə (The Climate Action Network for International Educators – CANIE) qoşulub.

BDU-dan TƏHSİL.BİZ -ə bildirilib ki, bu addım universitetin ekoloji məsuliyyət, qlobal çağırışlara cavab və beynəlxalq əməkdaşlıq istiqamətində strateji səylərinin mühüm göstəricisidir.

CANIE beynəlxalq təhsil sahəsində fəaliyyət göstərən qurum və mütəxəssisləri bir araya gətirən aparıcı qeyri-kommersiya şəbəkəsidir. Təşkilatın əsas məqsədi ali təhsil və akademik mobillik sektorunun iqlim dəyişikliyi ilə mübarizədə fəal iştirakını təşviq etmək, bu sahədə praktiki həll yollarının formalaşdırılmasına töhfə verməkdir. Sözügedən şəbəkənin QS Dayanıqlılıq Reytinqi tərəfindən tanınması qurumun ali təhsil sahəsində iqlim dəyişikliyi ilə mübarizədə artan qlobal təsirini göstərir.

BDU-nun CANIE üzvlüyü çərçivəsində həyata keçirəcəyi əsas istiqamətlərə fəaliyyətlərində karbon izinin azaldılması, ekoloji təhsil və maarifləndirmə təşəbbüslərinin gücləndirilməsi, yaşıl kampus strategiyalarının inkişaf etdirilməsi, eləcə də davamlı və ətraf mühitə uyğun akademik mobillik modellərinin tətbiqi daxildir.

Universitetin bu təşəbbüsü artıq uğurla icra olunan ekoloji proqramlar – xüsusən də “ECOLEAD” layihəsi və “Yaşıl universitet” konsepsiyası ilə birbaşa uzlaşır və BDU-nun ali təhsildə dayanıqlılıq və ətraf mühitə məsuliyyətli yanaşma üzrə liderliyini daha da gücləndirir.

BDU sözügedən şəbəkəyə Azərbaycandan üzv olan ilk ali təhsil müəssisəsidir.