Akademiyanın Rəyasət Heyətinin binasında AMEA-nın prezidenti akademik İsa Həbibbəylinin ideya müəllifi olduğu “Heydər Əliyev: şəxsiyyətin miqyası və missiyası” adlı fundamental kollektiv monoqrafiyanın təqdimat mərasimi keçirilib.
AMEA-dan TƏHSİL.BİZ -ə bildirilib ki, təqdimat mərasimində çıxış edən akademik İsa Həbibbəyli Ümummilli Lider Heydər Əliyevin zəngin həyatı və fəaliyyətinin daim elm xadimlərinin tədqiqat mövzusu olduğunu söyləyib. Qeyd edib ki, XX əsrin ikinci yarısından sonrakı Azərbaycanın və SSRİ-nin siyasi-tarixi proseslərini Heydər Əliyev faktorundan bəhs etmədən obyektiv və tam halda izah və əhatə etmək mümkün deyil.
Dahi liderin həyatı, mübarizəsi və ideallarının həm mənsub olduğu xalqın və ölkənin tarixində, həm də geniş mənada dünyanın siyasi-tarixi gedişatında mühüm yer tutduğunu deyən akademik İsa Həbibbəyli hələ sovet dövründən başlayaraq Ulu Öndərə həsr edilmiş əsərlərin, şeirlərin yazıldığını, görkəmli dövlət xadiminin “Literaturnaya qazeta”ya verdiyi “Qoy ədalət zəfər çalsın” başlıqlı müsahibəsindən sonra isə elmi-ideoloji məqalələrin çap edilməyə başlandığını diqqətə çatdırıb. Bildirib ki, ötən illər ərzində nəinki Azərbaycanda, həmçinin Türkiyədə, MDB ölkələrində, eləcə də dünyanın bir çox ölkəsində Ümummilli Liderə həsr edilmiş kitablar, monoqrafiyalar işıq üzü görüb.
Dövlətimizin başçısı tərəfindən 2023-cü ilin “Heydər Əliyev İli” elan edilməsi ilə bu istiqamətdə daha çox əsərlərin ortaya qoyulduğunu deyən akademik İsa Həbibbəyli bu nəşrlərin xüsusilə fundamental tədqiqatları əhatə etdiyini vurğulayıb. Qeyd edib ki, ötən illər ərzində dahi liderin həyat və fəaliyyətinin müəyyən dövrlərini, müxtəlif sahələrin yaranması və inkişafına göstərdiyi tarixi xidmətlərini əks etdirən nəşrlər işıq üzü görsə də, bu əsərlər mahiyyətcə daha çox tanıtma kitabı və konfrans materiallarını əhatə edib. Lakin 2023-cü ildən etibarən AMEA-da dahi liderin çoxillik fəaliyyəti və ömür yolunu əks etdirən fundamental tədqiqatlar aparılmaqla, “Heydər Əliyev İli”ndə alimlərimiz tərəfindən 52 fundamental əsər ortaya qoyulub.
Həmçinin bu günə qədər Ulu Öndərə həsr edilmiş ümumiləşmiş kitabın olduqca azlıq təşkil etdiyini deyən akademik İsa Həbibbəyli bu istiqamətdə də qarşıya qoyulmuş hədəfləri əsas götürərək təqdimatı keçirilən əsərin meydana qoyulduğunu söyləyib. Bildirib ki, “Heydər Əliyev: şəxsiyyətin miqyası və missiyası” fundamental kollektiv monoqrafiyası Ulu Öndərin tərcümeyi-halının, çoxcəhətli siyasi-dövlətçilik fəaliyyətinin və mübarizəsinin bütün mərhələlərini əks etdirir. Diqqətə çatdırıb ki, monoqrafiyanın müəllifləri uzun illər ərzində Ulu Öndər Heydər Əliyevin həyat və fəaliyyətinin tədqiqi ilə peşəkar səviyyədə məşğul olmuş Milli Elmlər Akademiyasının müxtəlif elmi-tədqiqat institutlarında çalışan 24 tanınmış Azərbaycan alimindən ibarətdir. Akademik İsa Həbibbəyli nəşrin həcmi, ədəbiyyatı və müəlliflər heyəti ilə bu günə qədər dahi liderə həsr edilmiş fundamental tədqiqatların ən təkmilləşdirilmiş variantı və bələdçisi olduğunu söyləyib.
Sonra nəşrin elmi redaktoru, AMEA-nın akademik-katibi akademik Arif Həşimov çıxış edərək monoqrafiyanın Akademiyanın 80 illiyi ərəfəsində işıq üzü görməsi və təqdimatının keçirilməsinin əlamətdar olduğunu söyləyib. Bildirib ki, monoqrafiyada Azərbaycan xalqının Ümummilli Lideri Heydər Əliyevin mənalı və keşməkeşli həyatı və mübarizəsinin mahiyyəti, tarixi əhəmiyyəti, müasir dövrdəki yeri və rolu elmi cəhətdən əsaslandırılmış şəkildə təqdim edilir.
Akademik Arif Həşimov AMEA-nın “Elm” nəşriyyatında çap olunan monoqrafiyanın “Azərbaycanın dünyamiqyaslı görkəmli dövlət xadimi”, “Azərbaycançılıq ideologiyasının banisi”, “Azərbaycanın elm və təhsilinin böyük hamisi və bələdçisi”, “Azərbaycanın ədəbiyyat və mədəniyyətində dərin iz qoyan şəxsiyyət” və “Xarici siyasətin Heydər Əliyev modeli” olmaqla, 5 fəsildən ibarət olduğunu diqqətə çatdırıb. Nəşrdə dahi liderin iqtisadi, siyasi, elmi, ədəbi, mədəni, Azərbaycan dilinin qorunması, Türk dünyası və digər sahələrdəki tarixi xidmətlərini əks etdirən fundamental məqalələrin yer aldığını vurğulayıb.
Akademik Arif Həşimov Ulu Öndərin çoxcəhətli fəaliyyətinin əsas istiqamətlərinə həsr edilmiş ilk fundamental monoqrafik tədqiqatın Akademiyada işıq üzü görməsinin alimlərimizin gərgin əməyinin nəticəsi olduğunu söyləyib.
Təqdimat mərasimində, həmçinin monoqrafiyanın müəlliflərindən akademik Rasim Əliquliyev, akademik Gövhər Baxşəliyeva, AMEA-nın müxbir üzvü Ərtegin Salamzadə, professor İlham Məmmədzadə, tarix üzrə fəlsəfə doktoru Cəbi Bəhramov və siyasi elmlər üzrə fəlsəfə doktoru Sənan Həsənov çıxış edərək çoxvektorlu fəaliyyəti ilə Azərbaycanın tarixində dərin izlər qoymuş, xalqımızı, dövlətimizi bir çox bəlalardan xilas edərək gələcəyə hədəflənmiş inkişaf yoluna, dövlət quruculuğuna yönəltmiş dahi liderin həyat və fəaliyyətinin tədqiq olunmasının alimlərimizin ümdə vəzifəsi olduğunu bildiriblər. Qeyd olunub ki, Heydər Əliyev fəaliyyətinin bütün dövrlərində başlıca olaraq xalqını, dövlətini düşünüb, atdığı bütün doğru addımlarla Azərbaycanı inkişafa aparıb, nəinki ölkəmizdə, keçmiş SSRİ-də, bütün dünyada peşəkar siyasətçi, dövlət xadimi olaraq qəbul edilib, xarizmatik siyasi fəaliyyəti ilə daim diqqət mərkəzində olub.
Sonda çıxış edən akademik İsa Həbibbəyli bildirib ki, təqdim olunan fundamental monoqrafiya Heydər Əliyevi öyrənməyin mükəmməl örnəyi, elmi portretidir və dahi liderin həyatı və fəaliyyətini gələcək nəsillərə tanıtmaq alimlərimizin daim diqqətindədir.