Bakı Dövlət Universitetinin “BDU könüllüləri” təşkilatı, Tələbə Gənclər Təşkilatı, Tələbə Həmkarlar İttifaqı Komitəsi və “Qayıdış” İctimai Birliyinin birgə təşkilatçılığı ilə Aprel döyüşlərinin doqquzuncu ildönümü qeyd olunub.
Bu barədə TƏHSİL.BİZ -ə BDU-dan bildirilib.
Əvvəlcə Dövlət Himni səsləndirilib, Ümummilli Lider Heydər Əliyevin və şəhidlərimizin əziz xatirəsi bir dəqiqəlik sükutla yad edilib.
BDU-nun beynəlxalq əlaqələr üzrə prorektoru Şahin Pənahov bildirib ki, 2016-cı ilin aprelində Ermənistan silahlı qüvvələrinin təxribatlarına cavab olaraq keçirilmiş hərbi əməliyyat zamanı qazanılmış qələbə, Zəfər tariximizin başlanğıcı olan Aprel döyüşləri ordumuzun gücünü, xalqımızın mübariz ruhunu bütün dünyaya göstərdi. Uğurlu əməliyyatlar nəticəsində Talış kəndi istiqamətindəki yüksəkliklər işğalçılardan təmizləndi. Horadiz şəhərinin düşmən təhlükəsindən qorunması məqsədilə Füzuli rayonu istiqamətində yerləşən, olduqca strateji əhəmiyyətli Lələtəpə yüksəkliyi azad edildi. Ağdərə-Suqovuşan istiqamətində yolların nəzarətdə saxlanılması təmin olundu. 2020-ci ildə Vətən müharibəsi, 2023-cü ildə antiterror tədbirləri ilə Azərbaycan öz ərazi bütövlüyünü, tarixi ədaləti və dövlət suverenliyini tam bərpa edib.
Tədbirin moderatoru, BDU-nun Humanitar məsələlər və gənclər siyasəti şöbəsinin müdiri Ramin Səmədov Aprel döyüşlərinin Azərbaycan dövlətinin qüdrətinin, ordumuzun gücünün və xalqımızın birliyinin təntənəsinə çevrildiyini deyib. O, BDU-nun məzunu olan tələbələrin də ərazi bütövlüyümüz uğrunda döyüşlərdə yaxından iştirak etdiyini bildirib. Qeyd edib ki, 44 günlük Vətən müharibəsində BDU-nun 22 məzunu qəhrəmancasına şəhid olub.
Milli Məclisin deputatı Ülviyyə Həmzəyeva Aprel döyüşlərində qazanılan qələbənin əsgər və zabitlərimizin peşəkarlığının, mənəvi-psixoloji hazırlığının, döyüş ruhunun, vətənpərvərlik hissinin yüksək səviyyədə olması nəticəsində gerçəkləşdiyini bildirib.
“Vətən fədailəri” layihəsinin rəhbəri, yazıçı-jurnalist Manya Səxavətqızı, layihənin iştirakçısı Şahin Məmmədov Azərbaycanın qəhrəman oğulları, şəhidləri haqqında ərsəyə gətirdikləri kitablar barədə məlumat verib, onları tələbələrə təqdim ediblər.
“Qayıdış” İctimai Birliyinin sədri Hasil Tağıyev gənc nəslə vətənpərvərlik hisslərinin aşılanması və tarixi gerçəkliklərin tanıdılması baxımından belə tədbirlərin mütəmadi keçiriləcəyini deyib.
Tədbirin sonunda viktorina keçirilib, qaliblərə hədiyyələr təqdim olunub.
