Qazaxıstanın Yesenov adına Xəzər Dövlət Texnologiyalar və Mühəndislik Universitetinin müəllimləri Azərbaycan Dövlət Pedaqoji Universitetində (ADPU) əməkdaşlıq müqaviləsi çərçivəsində mobillik proqramında iştirak ediblər.

Bu barədə TƏHSİL.BİZ -ə ADPU-dan məlumat verilib.

Səfər çərçivəsində Xəzər Dövlət Texnologiyalar və Mühəndislik Universitetinin Pedaqogika kafedrasının baş müəllimi Manet Janqoziyeva və professoru Zaini Kokşeyeva ADPU-nun beynəlxalq əlaqələr üzrə prorektoru professor Mahirə Hüseynova və Beynəlxalq əlaqələr şöbəsinin müdiri Günay Məhərrəmova ilə görüşərək universitetlərarası əməkdaşlıq, tədris və elmi-tədqiqat sahələrində inkişaf perspektivləri haqqında müzakirə aparıblar. Daha sonra onlar İbtidai təhsil və Məktəbəqədər təhsil fakültələrinin rəhbərliyi və müəllim heyəti ilə görüşüblər. Söhbət zamanı pedaqoji təcrübə, tədris metodikası və tələbə mübadilə proqramları ilə bağlı məsələlərə toxunulub.

Qonaqlar, həmçinin ADPU-nun Təlim-Tədris Mərkəzində olub, müasir tədris yanaşmaları və pedaqoji innovasiyalar haqqında təqdimat və müzakirələrdə iştirak ediblər.

Mobillik proqramının yekununda müəllimlər ADPU-nun beynəlxalq əlaqələr üzrə prorektoru professor Mahirə Hüseynova ilə ikitərəfli akademik əlaqələrin möhkəmləndirilməsi, elmi tədqiqatların birgə həyata keçirilməsi və əməkdaşlıq perspektivləri haqqında müzakirə aparıblar.

Sonda professor Mahirə Hüseynova qonaq müəllimləri sertifikatlarla təltif edib.