AMEA A.A.Bakıxanov adına Tarix və Etnologiya İnstitutu ilə Tacikistan Milli Elmlər Akademiyası A.Doniş adına Tarix, Arxeologiya və Etnoqrafiya İnstitutu arasında anlaşma memorandumu imzalanıb.

İnstitutdan TƏHSİL.BİZ-ə bildirilib ki, bu sənədin imzalanması iki ölkə arasında elmi-tədqiqat sahəsində əməkdaşlığın genişlənməsi və möhkəmlənməsi baxımından əhəmiyyətli addımdır. Memorandum tarix və etnologiya sahələrində mütəxəssislərin qarşılıqlı təcrübə mübadiləsi aparmasını, elmi resursların paylaşılmasını, müştərək elmi konfransların, simpoziumların, seminarların, toplantıların təşkilini, birgə layihələrin həyata keçirilməsini nəzərdə tutan platforma yaradacaq.

Bu əməkdaşlıq Azərbaycanın və Tacikistanın tarixi və etnologiyasının daha dərindən öyrənilməsinə, elmi fəaliyyətlərin beynəlxalq səviyyədə tanınmasına və mövcud elmi potensialın gücləndirilməsinə imkan yaradacaq.

Xatırladaq ki, 2024-cü il dekabrın 18-də Tacikistanın Düşənbə şəhərində Azərbaycan Respublikası və Tacikistan Respublikası arasında ticarət-iqtisadi əməkdaşlıq məsələləri üzrə Birgə Hökumətlərarası Komissiyanın 7-ci iclası keçirilib. İclasın yekunlarına dair protokolun “Elm və təhsil sahəsində əməkdaşlıq haqqında” 7-ci bəndinin 7.7 yarımbəndinə əsasən AMEA A.A.Bakıxanov adına Tarix və Etnologiya İnstitutu ilə Tacikistan MEA A.Doniş adına Tarix, Arxeologiya və Etnoqrafiya İnstitutu arasında elmi əməkdaşlıq haqqında anlaşma memorandumunun imzalanması əksini tapıb.