Kataliz və Qeyri-üzvi Kimya İnstitutunun və Azərbaycan Tibb Universitetinin əməkdaşlarının həmmüəllif olduqları kitab Londonda “IntechOpen” elmi nəşriyyatı tərəfindən çap edilib.

İnstitutdan TƏHSİL.BİZ -ə bildirilib ki, “Ətraf mühitdəki ağır metallar - çirklənmə, risk və bərpa tədbirləri” (Heavy Metals in the Environment - Contamination, Risk, and Remediation) adlı kitabda müxtəlif yaşayış yerlərində ağır metalların miqrasiyası, çirklənməsi və çevrilməsi haqqında məlumat verilir. Təbii sistemlərdə ağır metalların davranışını təyin edən kimyəvi, fiziki və bioloji proseslər nəzərdən keçirilir, mövcud tədqiqatlara kritik baxış verilməklə bu mexanizmlərin ətraflı anlaşılmasını təmin etmək üçün konkret nümunələr göstərilir. Ağır metalların insan sağlamlığı və ekosistemlər üçün yaratdığı risklər də nəzərdən keçirilir. İqtisadi cəhətdən inkişaf edən regionlarda və yüksək sənaye aktivliyi olan ərazilərdə ağır metalların toksikoloji təsirlərinə xüsusi diqqət yetirilir. Həmçinin bərpa texnologiyaları və ağır metal çirklənməsinə qarşı tədbirlər nəzərdən keçirilir.

Bu kitab ətraf mühit və ekologiya, kimya, mühəndislik və ictimai səhiyyə daxil olmaqla müxtəlif sahələrdə ekspertlər və tədqiqatçılar üçün dəyərli mənbədir. Qeyd etmək lazımdır ki, Mitsuo Yoshida tərəfindən redaktə edilən kitab “Web of Science” (Book Citation Index) bazasında indeksləşdirilib.