Mingəçevir Dövlət Universitetində (MDU) böyük Zəfərə aparan tarixi Aprel döyüşlərinin doqquzuncu ildönümünə həsr olunan "Qəhrəmanlıq tariximizin şanlı səhifəsi: Aprel döyüşləri" mövzusunda elmi-praktik konfrans keçirilib.

MDU-dan TƏHSİL.BİZ -ə bildirilib ki, tədbirdə akademik heyət, şəhid ailələrinin üzvləri, Vətən müharibəsi iştirakçıları və tələbələr iştirak ediblər. Konfransda öncə Vətən uğurunda canlarından keçən şəhidlərin əziz xatirəsi dərin ehtiramla yad olunub və Dövlət Himni səsləndirilib. Konfransı Mingəçevir Dövlət Universitetinin rektor vəzifəsini müvəqqəti icra edən, tədris məsələləri üzrə prorektor Üzeyir Zeynalov açaraq Aprel döyüşlərinin Azərbaycan tarixində mühüm rol oynadığını vurğulayıb. Daha sonra Aprel döyüşlərinə həsr olunmuş videoçarx nümayiş etdirilib.

Konfransda MDU-nun müəllimi, tarix üzrə fəlsəfə doktoru Vüsalə Mövlayevanın "Böyük Zəfərə aparan qəhrəmanlıq salnaməsi", MDU-nun kafedra müdiri dosent Mahir İsmayılovun "Gənc nəslin vətənpərvərlik ruhunda tərbiyəsində Aprel zəfərinin rolu", MDU-nun müəllimi, doktorant Ceyran Vəliyevanın "Aprel döyüşlərinin ədəbiyyatımızda əks-sədası" mövzularında məruzələri dinlənilib.

Tədbirdə Aprel döyüşlərinin tarixi əhəmiyyəti, onun gənc nəslin vətənpərvərlik tərbiyəsindəki rolu və ədəbiyyatımıza təsiri geniş müzakirə edilib. İştirakçılar bu qəhrəmanlıq salnaməsinin gələcək nəsillərə ötürülməsinin vacibliyini qeyd ediblər. Tədbirin sonunda müzakirələr aparılıb və Aprel döyüşlərinin Azərbaycan xalqının yaddaşında əbədi yaşayacağı vurğulanıb.