Azərbaycan Respublikası Elm və Təhsil Nazirliyinin təşkilatçılığı və “Kapital Bank”ın dəstəyi ilə “Təhsil Oyunları Platforması” layihəsi Azərbaycan dilində məktəb, lisey və kollec müəllimlərindən və inzibati işçilərindən ibarət olan komandalar üçün “Nə? Harada? Nə zaman?” oyunu üzrə Respublika çempionatını elan edir. 

TƏHSİL.BİZ xəbər verir ki, canlı final oyunu Bakı şəhərində 27 apreldə keçiriləcək. Finalda maksimum 30 komanda iştirak edəcək. Müraciət edən komandaların sayı bu rəqəmdən artıq olsa, onlayn seçim turu 22 apreldə təşkil olunacaq.

Kimlər iştirak edə bilərlər?

Bütün məktəb, lisey və kollec işçiləri iştirak edə bilərlər. Yaş limiti yoxdur. İştirak üçün uyğun yaş qrupuna aid 6 nəfərdən ibarət komanda təşkil olunmalıdır (1 nəfər kapitan + 5 oyunçu). 

Yarışa qeydiyyat necə aparılır?

Komandaların qeydiyyatı onlayn aparılır. Komanda üzvlərin bir təhsil müəssisəsindən olması mütləq deyil. Qeydiyyat üçün son tarix – 20 aprel saat 18:00-dır. 

Bütün qeydiyyatdan keçən komandaların kapitanlarına 21 apreldə qeydiyyat vaxtı göstərdikləri elektron ünvanlarına (maillərə) məktub göndəriləcək. Həmin məktubda oyuna qoşulma qaydaları izah olunacaq. Əgər 21 aprel 23:59-dək kapitan elektron poçt qutusunda bizdən cavab görmürsə, deməli ya: 

• Qeydiyyat formasında imeylin yazılışında hərf səhvləri var;

• İmeyl dolub və əlavə məktublar qəbul etmir;

• Cavab məktubu “spam” qovluğuna düşüb.

Qeydiyyat üçün seçdiyiniz imeyli əvvəlcədən yoxlayın, onu işlək olduğuna əmin olun. 

Seçim turu necə olacaq?

Qeydiyyatdan keçən komandaların sayı 30-dan artıq olarsa, seçim turu təşkil olunacaq. Seçim turunda bütün qeydiyyatdan keçən komandalar iştirak edə bilər. Seçim 22 aprel saat 21:00-da “Təhsil Oyunları Platformasının” “YouTube” kanalında onlayn keçiriləcək. Seçim 2 tur, hər turda 12 sualdan ibarət olacaq. Əgər bir neçə komanda eyni suala cavab versə, əlavə göstəricilərdən istifadə olunacaq (sualların reytinqi).

Final necə keçiriləcək?

Final 27 apreldə Bakı şəhərində “Landmark” otelində təşkil olunacaq. Günün ilk yarısında bütün finalçılar “Nə? Harada? Nə zaman?” oyununda iştirak edəcəklər.  

Qeydiyyat formasını doldurmaq üçün link: https://shorter.me/l_5Gx