Naxçıvan Dövlət Universitetinin Elmi Kitabxanasında, Naxçıvan Dövlət Universitetinin diplom şöbəsinin müdiri, “Ümumi tarix” kafedrasının müəllimi Nazlı Seyidovanın 65 illik, “Muzeyşünaslıq, arxiv işi və kitabxanaçılıq” kafedrasının baş müəllimi Yasəmən İsmayılovanın isə 70 illik yubileyləri qeyd olunub.

Naxçıvan Dövlət universitetinin rektoru Elbrus İsayev Nazlı Seyidovanı təbrik edərək qeyd edib ki, tədris şöbəsindəki məsuliyyətli fəaliyyəti, həm də pedaqoji sahədəki peşəkarlığı ilə seçilir. Rektor Nazlı xanımın işgüzar yanaşmasını və tələbələrin yetişdirilməsindəki rolunu yüksək qiymətləndirib. Sonra Elbrus İsayev ikinci yubilyar- Yasəmən İsmayılovanın fəaliyyətini yüksək qiymətləndirərək bildirib ki, onun intellektual səviyyəsi və geniş dünyagörüşü universitetin kitabxana mədəniyyətinin formalaşmasında mühüm rol oynamışdır. Rektor hər iki yubilyarı təbrik edərək elmi-pedaqoji fəaliyyətlərində uğurlar arzu edib, universitetin fəxri fərmanını onlara təqdim edib.

Naxçıvan Dövlət Universitetinin Tarix-filologiya fakültəsinin dekanı Arif Ağalarov, “Ümumi tarix” kafedrasının müdiri Rəsul Bağırov, “Muzeyşünaslıq, arxiv işi və kitabxanaçılıq” kafedrasının müdiri Məmməd Əliyev və digərləri çıxış edərək hər iki yubilyar barədə xoş fikirlərini çatdırıb, təəssüratlarını bölüşüblər. Qeyd olunub ki, Nazlı Seyidova və Yasəmən İsmayılova uzun illərdir NDU-nun elmi-pedaqoji həyatında fəal iştirak edir, peşəkar və ixtisaslı kadrların hazırlanma işinə mühüm töhfə veriblər. Çıxış edənlər NDU-da qocaman müəllimlərin qeyd olunmasını pedaqoq adına verilən yüksək dəyər kimi qiymətləndiriblər.

Tələbələr təbriklərini çatdırıb, yubilyarlara gül dəstəsi təqdim ediblər. Sonda hər iki müəllim göstərilən diqqətə görə minnətdarlıq bildiriblər.