Cari ilin oktyabrın 12-dən Elm və Təhsil Nazirliyinin Təhsildə inkişaf və innovasiyalar üzrə VIII qrant müsabiqəsində qalib olmuş “Zəfər yolu – elmin və biliyin gücü” adlı layihənin icrasını təmin etmək məqsədilə altımərhələli intellektual bilik yarışının final mərhələsi dekabrın 21-də keçirilib.

TƏHSİL.BİZ  xəbər verir ki, dekabrın 7-də yarışın yarımfinal mərhələsi keçirilib, Abşeron rayonunun 1, 5 və 7 nömrəli tam orta məktəblərini təmsil edən komandalar yarımfinala çıxıblar. Dekabrın 21-də keçirilən yarışın final mərhələsində həmin komandalar bilikləri ilə qələbə uğrunda mübarizə aparıblar. Qalib Abşeron rayonu 1 nömrəli tam orta məktəbi təmsil edən “Abşeronun dahi abituriyentləri” komandası olub.

Finalda bütün komanda üzvlərinə təşəkkürnamə və hədiyyələr, qalib komandaya isə kubok və xüsusi hədiyyələr verilib. 

Onu da qeyd edək ki, tədbirdə Abşeron rayonu 5 nömrəli tam orta məktəbin direktoru Vüsal Süleymanov, Abşeron-Xızı Regional Təhsil İdarəsinin Abşeron sektoru üzrə əməkdaşı, şəhid baş leytenant Hüseyn Nəcəfzadənin anası Könül Nəcəfzadə, Vətən müharibəsi qəhrəmanı, şəhid Veysəl Musibovun anası Səməngül Musibova, birinci Qarabağ müharibəsi zamanı qəhrəmancasına şəhid olmuş Edik Quliyevin qızı Turanə Quliyeva, Xırdalan şəhər 1 nömrəli tam orta məktəbin hərbi müəllimi, Vətən müharibəsi iştirakçısı, ehtiyatda olan polkovnik-leytenant Rövşən Quliyev, ll Qarabağ müharibəsi iştirakçısı, polkovnik Nəsib Əhmədov, ll Qarabağ müharibəsi iştirakçısı, ehtiyatda olan polkovnik-leytenant Ayaz Qasımov, ll Qarabağ müharibəsi iştirakçısı, qazi Elvin Rəsulov, Yasamal rayon 13 nömrəli tam orta məktəbin müəllimi Vəfa Rəhimova və 83 nömrəli məktəb-liseyin müəllimi, yarışda istifadə edilmiş sualların tərtibatçısı Kəmalə İslam yüksək səviyyədə həyata keçirilmiş layihənin əhəmiyyətindən danışaraq, şagirdlərin biliyinə, Vətən müharibəsi iştirakçılarına və onların ailələrinə göstərdikləri xüsusi diqqətə görə zəhməti olan hər kəsə təşəkkürlərini bildirib, uğurlar arzulayıblar.

Tədbir Xırdalan şəhər 11 nömrəli musiqi məktəbinin istedadlı yeniyetmələrinin bir-birindən gözəl ifaları ilə başa çatıb.

Xatırladaq ki, layihənin rəhbəri Abşeron rayonu Veysəl Musibov adına 5 nömrəli tam orta məktəbin biologiya müəllimi Jalə Qasımovadır.

Tural Quluzadə