Tehsil.biz "Təhsil Forumu-2021" feysbuk qrupunun rəhbəri Emil Tağızadə ilə müsahibəni təqdim edir:
- Emil bəy, sosial şəbəkə səhifələrinin birində sizinlə bağlı "fake" profillə məlumat yayımlanmışdır. Həmin məlumatdan xəbəriniz varmı və nə üçün həmin yazıya reaksiya vermədiniz?
- Bəli, məlumatım var. Ancaq mən o cür yazılara vaxt ayırmağı boş və mənasız hesab edirəm. Çünki ona reaksiya verməkdən daha önəmli işlərimiz var. Bildiyiniz kimi biz təhsilin inkişafına ictimai xidmət olaraq fəaliyyət göstəririk. Görünür ki, bu da bir çoxunda paxıllıq hissi yaradır.
- Düşünürsünüz ki, bu sizə olan paxıllıqdır? Bəlkə sifarişli və qərəzli bir yazıdır?
- Paxıllıq da ola bilər, sifarişli də ola bilər. Hər iki halda mən həmin yazıya heç bir reaksiya vermədim. Çox sağ olsunlar, tanımadığım şəxslər həmin yazıya fikirlərini yazaraq mənim haqda müsbət fikirlər yazıblar. Hər halda “Elin gözü tərəzidir".
- Həmin məlumatda marağımızı çəkən bir yazı oldu. Deyilirdi ki, nə təhsili, nə də iş fəaliyyəti təhsillə bağlıdır. Bu haqda nə deyə bilərsiniz?
- Mən Mühasibat uçotu və Audit ixtisası üzrə həm bakalavr, həm də magistr təhsilliyəm. Mənim ixtisasım niyə bu qədər narahat edir ki onları, mən bunu anlamıram. Əgər ixtisas bu qədər narahatlıq yaradırsa, o zaman Təhsil Nazirliyinə, Təhsil İnstitutuna, BŞTİ-yə və bir çox Təhsil Şöbələrinə nəzər salsalar, ixtisası aqranom, zootexnik, baytarlıq, mühəndis, iqtisadçı və digər ixtisas olduqlarının şahidi olacaqlar. İş fəaliyyətimə gəlincə isə mən artıq 3 ildir ki, Kurikulum, Məntiq və Müsahibə hazırlığı ilə məşğulam. Müdavimlərimin nəticələri də göz qarşısındadır. Bundan əlavə hazırladığım vəsaitlər hesabına on minlərlə müdavim sərbəst hazırlaşıb müəllim adını alıb. Hal – hazırda 3 onlayn kursda bu istiqamətdə tədris edirəm. Bəs bu işlər nədir, təhsillə bağlı fəaliyyət deyilmi? Onlara demək lazımdır ki, məgər kurikulum, məntiq və müsahibə hazırlığı üçün hansısa pedaqoji ixtisası bitirməkmi lazımdır?
- Diqqətimizi çəkən bir yazı da vardır ki, siz məktəblərə gedir, direktorlara və müəllimlərə diplom və sertifikatlar təqdim edirsiniz. Bunu necə həyata keçirirsiniz?
- Bu sualı mənə bir çoxları da ünvanlayır. Nəzərinizə çatdırım ki, hər şeydən öncə mən Media nümayəndəsiyəm. Ayrı–ayrı vaxtlarda müəyyən redaksiyalarda çalışmışam. Hazırda isə 4 redaksiyanın nümayəndəsiyəm. Media nümayəndəsi olaraq sorğu keçirə, məlumatları ictimailəşdirə, müəyyən müsabiqələr təşkil edə və fəal şəxsləri mükafatlandıra bilərik. Bunun nəyi bəzilərini narahat edir ki? Məqsədim fəal müəllimləri tanıtmaq, istedadlı şagirdləri tanıtmaq, məktəblərin fəaliyyətini və keçirdiyi tədbirləri tanıtmaqdır.
- Müəyyən müsabiqələr deyərkən nə kimi müsabiqələr təşkil etmisiniz və bunu necə həyata keçirirsiniz?
- Məsələn əlamətdar günlərlə bağlı rəsm müsabiqəsi, məqalə müsabiqəsi, şeir müsabiqəsi, olimpiada yarışları və s. Biz bu müsabiqələri onlayn qaydada həyata keçiririk və qaliblərimizi diplom və sertifikatlarla təltif edirik. Bundan əlavə Tanıdım layihələrimiz də vardır ki, ictimaiyyətin ən çox iştirak etdiyi layihələrdəndir. Məsələn: Tanıyaq və Tanıdaq layihəsində artıq 3000-dən çox müəllim iştirak edib. Bizdən sonra bu layihənin oxşar tipini bir çox səhifələr, hətta AGMA və AMA kimi təhsil qurumları da həyata keçirirlər.
- Emil bəy, bəs necə oldu ki, bu platformanı yaratdınız və ictimaiyyəti tez bir zamanda bu platformaya cəlb edə bildiniz?
- Mən ilk öncə müəllim ailəsində böyümüşəm. Orta məktəb illəindən riyaziyyatı çox sevmişəm. Bu məndə məntiqə daha çox meyil yaradıb. Vatsapda bəzi məntiq qruplarında insanlara bacardığım qədər köməklik göstərirdim. Sonra özüm vatsapda məntiq qrupları yaratdım. Tədricən bütün fənlər üzrə qruplar yaratdım və həmin qruplara tanıdığım uyğun müəllimləri inzibatçı olaraq təyin etdim. Qruplara ehtiyac çox olduğundan yer məhdudiyyəti yarandıqca yeni qruplar yaratdım. Sonra düşündüm ki, qruplara nəzarət çətinlik yaradır, ondansa "Facebook" sosial şəbəkəsi üzərindən bu fəaliyyətimizi davam etdirək. Beləcə, 2019-cu il may ayında Təhsil Forumu Sosial Platformasını yaratdıq. Qrupda ilk vaxtlar ancaq müəllimlərə ən çox vacib olan bütün fənlər üzrə KSQ, BSQ, Test topluları, Sınaq İmtahan sualları, Məntiq Məsələləri, Kurikulum İzahları və Testləri paylaşılırdı. Bu da hər kəsə vacib olduğu üçün ictimaiyyətin marağına səbəb oldu.
