Azərbaycan Dövlət Aqrar Universitetində (ADAU) “Universitet Günü” münasibətilə təntənəli tədbir keçirilib.

TƏHSİL.BİZ -in bölgə müxbiri xəbər verir ki, tədbirdən əvvəl iştirakçılar inzibati binanın foyesində tələbələrin rəsm işləri və müxtəlif laboratoriyaların stendlərinə baxış keçiriblər.

Dövlət Himninin səsləndirilməsi ilə başlayan tədbirdə torpaqlarımızın ərazi bütövlüyü uğrunda canlarından keçən şəhidlərin əziz xatirəsi bir dəqiqəlik sükutla yad edilib.

Çıxış edən rektor Zəfər Qurbanov “Universitet Günü” münasibətilə əməkdaşları təbrik edib. Bildirib ki, Azərbaycan Dövlət Aqrar Universiteti hələ uzun illər ölkəmizin kənd təsərrüfatının inkişafına öz töhfəsini verəcək. Perspektivlərdən və hədəflərdən danışan Zəfər Qurbanov ADAU-nun “UI Greenmetric 2024” dünya universitetlərinin reytinqinə daxil olduğunu da diqqətə çatdırıb.

Sonra Aqrar Universitetin tanıtım çarxı nümayiş olunub.

Çıxış edən professor Hasil Fətəliyev, dosent Siyasət Məmmədov, dosent Cəmaləddin Məmmədov və professor Nizami Seydəliyev kollektivi təbrik ediblər.

Daha sonra “Universitet Günü” münasibətilə bir qrup əməkdaş fəxri fərmanla təltif olunub.

Tədbir tələbələrin hazırladığı bədii hissə ilə davam edib.