Qazaxıstanın K.Satbayev adına Milli Elmi-Tədqiqat Universitetinin Energetika və Maşınqayırma İnstitutunun direktoru professor Kasım Elemesov və direktor müavini dosent Dinara Başkanbayeva Azərbaycan Dövlət Neft və Sənaye Universitetində (ADNSU) işgüzar ezamiyyətdə olublar. Qonaqlar ADNSU-nun prorektorları və dekanları ilə görüşüblər.

Bu barədə TƏHSİL.BİZ -ə Neft və Sənaye Universitetindən məlumat verilib.

Görüşdə iki universitetin müştərək icra etdiyi layihələr və əldə olunan nəticələrlə bağlı məlumatlar dinlənilib.

ADNSU-nun tədris işləri üzrə prorektoru dosent Qasım Məmmədov əməkdaşlıq çərçivəsində görülən işlərin qənaətbəxş olduğunu deyib və bundan sonra birlikdə qazanılacaq uğurların daha genişmiqyaslı olacağına əminliyini bildirib.

Görüşdə tələbə-müəllim mübadiləsi, birgə təcrübə proqramlarının icrası, hər iki ali təhsil müəssisəsinin elmi işçilərinin birlikdə tədqiqatlar aparması ilə yanaşı, “Quacquarelli Symonds” analitik agentliyi və beynəlxalq metrik bazalarda təmsil olunma, beynəlxalq əlaqələrin genişləndirilməsi məsələləri müzakirə edilib və perspektiv hədəflər müəyyən olunub.