Azərbaycan Dövlət Akademik Milli Dram Teatrının aparıcı səhnə ustası, görkəmli teatr və kino aktyoru, Xalq artisti Nurəddin Mehdixanlı Azərbaycan Turizm və Menecment Universitetinin (ATMU) qonağı olub.

Universitetdən TƏHSİL.BİZ-ə bildirilib ki, görüş ATMU-nun CreART Mədəniyyət Klubu tərəfindən təşkil edilib.

Səhnə fəaliyyətindən, yaratdığı obrazlardan, sənət yolunda qarşılaşdığı çətinliklərdən danışan N.Mehdixanlı tədbirə qatılan tələbələri seçdikləri peşəni sevməyə, məqsədlərinə doğru əzmlə, qətiyyətlə irəliləməyə çağırıb.

“Aktyor olmaq istəyən tarixçi, filoloq, dilçi, filosof olmalıdır”, - deyən sənətkar gənclərə dünyanın istənilən məkanında öz biliyi, mədəniyyəti ilə Azərbaycanı layiqincə təmsil etməyi məsləhət görüb.

Görüş aktyorun müəllifi olduğu şeirləri səsləndirməsi ilə başa çatıb.