Mingəçevir Dövlət Universitetində (MDU) tələbələrlə aparılan görüşlər və daxil olan sorğuların nəticələrinə əsasən, imtahan prosesi ilə bağlı bir sıra mühüm dəyişikliklərlə bağlı yeni qərarlar qəbul edilib.

Ali məktəbdən TƏHSİL.BİZ -ə bildirilib ki, qəbul edilən qərarlar universitetin imtahan sistemində daha obyektiv qiymətləndirmə və şəffaflığın təmin edilməsi məqsədi daşıyır.

Qərar qəbul edildiyi andan etibarən 20 gün ərzində universitetin ənənəvi jurnallarından imtina edilərək, dərsdə qiymətləndirmələri və qeydiyyat elektron jurnalda aparılacaq. Bu, həm tələbələrin, həm də müəllimlərin işini asanlaşdıracaq.

İmtahanların mərkəzləşdirilmiş qaydada aparılması üçün Elektron İmtahan Mərkəzi qurulacaq. Bu mərkəz tələbələrin imtahan prosesindən daha sürətli və şəffaf şəkildə keçməsinə imkan verəcək.

İmtahanlardan əvvəl tələbələrə test bankı təqdim ediləcək. Bu tələbələrin imtahanlara daha yaxşı hazırlanmalarını təmin edəcək.

Mühəndislik ixtisaslarında pilot imtahanların tətbiqi ilə tələbələrin bilikləri daha yaxşı qiymətləndiriləcək.

İmtahan proseslərinin təkmilləşdirilməsi və tələbələrə dəstək vermək məqsədilə "Qaynar xətt" yaradılacaq.

Tələbələrin təcrübə işinin təkmilləşdirilməsi və asanlaşdırılması üçün Elektron Təcrübə Portalı yaradılacaq. Bu portal tələbələrin praktiki fəaliyyətlərini daha effektiv şəkildə izləməyə imkan verəcək. Həmçinin magistr dissertasiyalarının müdafiəsi zamanı qabaqcıl sənaye nümayəndələri iştirak edəcəklər.

Şifahi, yazılı və test imtahanlarına hazırlıq məqsədilə tələbələrə əlavə olaraq 2 dərs təlimləri (seminarlar) verilməsi qərara alınıb. Bu tədbirlər tələbələrin imtahanlara daha yaxşı hazır olmalarını dəstəkləyəcək.