Elm və Təhsil Nazirliyinin təşəbbüsü, Məktəbəqədər və Ümumi Təhsil üzrə Dövlət Agentliyinin təşkilatçılığı ilə “Zəfər” respublika yaradıcılıq festival-müsabiqəsinə start verilib.
Nazirlikdən "Tehsil.biz"ə bildirilib ki, festival-müsabiqənin keçirilməsində məqsəd milli mədəniyyət və incəsənətin təbliği, uşaqları vətənpərvərlik, adət-ənənələrə hörmət ruhunda tərbiyə etmək, Vətən müharibəsində şəhid olmuş qəhrəmanlarımızın əziz xatirəsini ehtiramla anmaq, Azərbaycan Ordusunun Vətən müharibəsində zəfər yürüşü, şanlı qələbəsi və dünya hərb tarixində açdığı yeni səhifə ilə bağlı uşaq və gəncləri maarifləndirməkdir.
Festival-müsabiqə ümumi təhsil məktəblərinin, lisey və gimnaziyaların (uşaq musiqi və incəsənət məktəbləri istisna olmaqla) istedadlı şagirdləri arasında üç yaş qrupunda (6-10, 11-14 və 15-17) aşağıda qeyd edilə istiqamətlər üzrə keçirilir:
- ifa üzrə respublika müsabiqəsi;
- rəqs üzrə respublika müsabiqəsi;
- təsviri incəsənət və dekorativ-tətbiqi sənət üzrə respublika müsabiqəsi;
- dram üzrə respublika müsabiqəsi.
Festival-müsabiqə aşağıda qeyd edilən mərhələlər üzrə keçirilir:
Rayon (şəhər) mərhələsi aprelin 15-dən 30-dək keçirilir. Regional təhsil idarələrinin təşkilatçılığı ilə rayon və şəhərlərdə yaradılmış münsiflər heyətinin iştirakı əsasında şagirdlərin seçimi aparılır. Rayon (şəhər) mərhələsində I yerin qalibi olanlar zona mərhələsində iştirak etmək hüququ qazanırlar.
Zona mərhələsi may ayında keçiriləcək. Rayon və şəhərlər üzrə I yerin qalibləri zona mərhələsində iştirak etmək hüququ qazanırlar. Qaliblər haqqında protokollar zona mərhələsi keçirilən regional təhsil idarəsində yaradılmış təşkilat komitəsinə təqdim edilir.
Final mərhələsi may ayında Bakı şəhərində keçiriləcək. Nominasiya və yaş qrupları üzrə I yerin qalibləri final mərhələsində iştirak etmək hüququ qazanırlar.
Qaliblərin mükafatlandırılması və yekun tədbir oktyabr ayında Bakı şəhərində keçiriləcək.
Qeyd edək ki, yaş qrupu və nominasiyalar üzrə I, II və III yerlərin qalibləri Elm və Təhsil Nazirliyinin fəxri fərmanı və hədiyyələrlə mükafatlandırılacaqlar.
Müsabiqə ilə bağlı sual yaranarsa, +994 12 539 21 06; (012) 421 54 66; +994 12 597 13 42; +994 12 472 72 63 telefon nömrələri ilə əlaqə saxlanıla bilər.
