Azərbaycan Mətbuat Şurasının sədri Rəşad Məcid “Xalq  Mətbuat Mərkəzi”ndə tanınmış qələm sahibi, Əməkdar jurnalist İttifaq Mirzəbəylinin anadan olmasının 70 illiyinə həsr olunmuş yubiley tədbirində iştirak edib.

Bu barədə "Tehsil.biz"ə şuradan məlumat verilib.

Bildirilib ki, MŞ sədri Rəşad Məcid “Xalq qəzeti”nin mətbuatımızdakı flaqman rolundan danışıb, burada çalışdığı dövrü yada salıb və 10 il öncə İttifaq Mirzəbəyli ilə birlikdə xarici səfərdə olduğunu, onu “klassik” və “Qobustan qayası” adlandıraraq gözəl məsləkdaş kimi xarakterizə edib. Yubilyara Mətbuat Şurasının diplom plaketini təqdim edib.

“Xalq qəzeti”nin baş redaktoru, Əməkdar jurnalist Əflatun Amaşov tədbirdə yubilyara  ən xoş arzularını çatdıraraq onun peşəkar, vətənpərvər, dövlətsevər bir publisist kimi örnək keyfiyyətlərindən söz açıb. Ə.Amaşov İ.Mirzəbəylinin “Xalq qəzeti”ndən öncə Azərbaycan radiosunda çalışarkən, aparıcısı olduğu səhər verilişlərindəki vətəndaş mövqeyinin dinləyicilər arasında yüksək dəyər qazandığını və çox populyar olduğunu qeyd edib.

İş yoldaşları Qüdrət Piriyev, Tahir Rüstəmov, İlqar Həsənov, Rəfiqə Əsgərova, Məsaim Abdullayev, Qəzənfər Qasımov və Əliqismət Bədəlov yubilyarla bağlı ürək sözlərini söyləyiblər, ona yeni uğurlar diləyiblər.

Sonda çıxış edən İttifaq Mirzəbəyli qazandığı uğurlara görə ustadı olmuş qələm sahiblərinin ruhlarına borclu olduğunu söyləyib, yaradıcı kollektivə minnətdarlığını bildirib və bundan sonra da milli mətbuatımızın inkişafı naminə əlindən gələni edəcəyinə söz verib.

Qeyd edək ki, 1953-cü il fevralın 10-da Qəbələdə dünyaya göz açmış İ.Mirzəbəyli 43 yaşından “Xalq qəzeti” redaksiyasında çalışır. Qəzetin siyasət şöbəsinə rəhbərlik edir.