Azərbaycan Universiteti ilə Sosial Tədqiqatlar Mərkəzi arasında əməkdaşlıq haqqında memorandum imzalanıb.

Bu barədə TƏHSİL.BİZ -ə universitetdən məlumat verilib. Bildirilib ki, imzalanmadan əvvəl keçirilən görüşdə memorandumdan irəli gələn vəzifələr və Azərbaycan Universiteti, Sosial Tədqiqatlar Mərkəzi, Türkiyənin Fırat Universiteti və Rəcəb Tayyib Ərdoğan Universitetinin birgə təşkilatçılığı ilə mayın 23-25-də keçiriləcək 2-ci “Social Work & Social Research” (Sosial iş və sosial tədqiqat) beynəlxalq konfransına hazırlıq işləri müzakirə olunub.

Azərbaycan Universitetinin rektoru Səadət Əliyeva rəhbərlik etdiyi ali təhsil müəssisəsində sosial iş ixtisasının tədrisinə başlanması, tələbə və məzun sayı, məzunların məşğulluq vəziyyəti, ixtisas üzrə qurulan beynəlxalq əməkdaşlıqlar, nəzərdə tutulan planlar haqqında məlumat verib. Rektor qeyd edib ki, sosial iş ixtisası 2023-cü ildə bakalavriat səviyyəsi üzrə 5 il müddətinə beynəlxalq akkreditasiyadan keçib və bu, universitet üçün həm böyük məsuliyyət yaradır, həm də universitetin rəqabət qabiliyyətini artırır.

Sosial Tədqiqatlar Mərkəzinin İdarə Heyətinin sədri, deputat Zahid Oruc bildirib ki, universitetin fəaliyyətini izləyir və beynəlxalq reytinqlərdə əldə etdiyi uğurlarla yaxından tanışdır. Zahid Oruc əməkdaşlığın hər iki tərəf üçün faydalı və səmərəli olacağına inandığını qeyd edib.

Deputat, həmçinin vurğulayıb ki, Vətən müharibəsi və nəticələrinin təhlili ölkə üçün ən strateji sahələrdən birinin peşəkar sosial işçilərin hazırlanması olduğunu sübut edir.

Memorandumun icrası ilə tərəflər bu sahəyə öz töhfələrini verəcəklər.

Görüş qarşılıqlı fikir mübadiləsi ilə davam edib. Tərəflər arasında memorandumdan irəli gələn vəzifələrin yerinə yetirilməsi məqsədilə tədbirlər planının hazırlanması və tezliklə icrasına başlanmasına dair razılıq əldə olunub.

Memorandumu Azərbaycan Universitetinin rektoru filologiya üzrə fəlsəfə doktoru Səadət Əliyeva və Mərkəzin İdarə Heyətinin sədri, Milli Məclisin deputatı Zahid Oruc imzalayıblar.