“Azərkosmos”un KOSMİK Akademiyasının təşkilatçılığı ilə Gəncə Dünya Məktəbinin, Bakı Avropa Liseyinin, həmçinin ümumrespublika məktəblərinin 9-16 yaş aralığında olan şagirdləri martın 18-dən 23-dək Türkiyənin İzmir şəhərində yerləşən və dünya çapında tanınan “Space Camp Türkiye” kosmik düşərgəsinə səfər ediblər.

“Azərkosmos”dan TƏHSİL.BİZ -ə bildirilib ki, “Ulduzlar və planetlər arasında kosmik macəra” layihəsi çərçivəsində 28 nəfərlik heyət burada kosmos elmini yaxından öyrənmək, yeni biliklər qazanmaq və elmi fəaliyyətlərdə iştirak etmək imkanı əldə edib.

Layihənin məqsədi məktəblilərin kosmos elmi sahəsində bilik və bacarıqlarını artırmaq, elmi kəşflərə dair praktiki təcrübə qazandırmaq və eyni zamanda, qlobal dostluq və mədəni əlaqələri gücləndirməkdir.

Düşərgə müddətində iştirakçılar STEAM (elm, texnologiya, mühəndislik, incəsənət və riyaziyyat) istiqamətində bir sıra təlimlərə qatılacaq. Bunlar arasında astronavt simulyatoru hazırlığı, Aya uçuş missiyaları, Marsda kolonizasiya, hidrofonika, aeronavtika və aerokosmik təlimlər kimi mövzular yer alacaq. Məktəblilər komanda işi və liderlik bacarıqlarını da bu fəaliyyətlər vasitəsilə inkişaf etdirəcək.

Düşərgənin sonunda iştirakçılara Space Camp Türkiye tərəfindən beynəlxalq sertifikatlar təqdim olunacaq.

2000-ci ildə fəaliyyətə başlayan və ABŞ-ın Alabama şəhərindəki kosmik düşərgədən sonra dünya çapında ikinci mühüm mərkəz sayılan “Space Camp Türkiye” hər il 9-16 yaşarası 260 mindən çox məktəbliyə ev sahibliyi edir. Düşərgə 60-dan çox ölkədən gələn iştirakçılara STEAM sahəsində təlimlər və praktik fəaliyyətlər təqdim edir. Alabama Kosmik Elm Sərgi Komissiyası tərəfindən lisenziyalaşdırılan bu mərkəz, eyni zamanda, Türkiyə Məktəbli Düşərgələri Assosiasiyasının fəal üzvüdür.

“Azərkosmos”un nəzdində fəaliyyət göstərən KOSMİK Akademiyanın bu kimi təşəbbüsləri azərbaycanlı məktəblilərin kosmos, rəqəmsallaşma, innovasiya və STEAM sahəsində bilik və bacarıqlarını artırmaqla yanaşı, Azərbaycanda insan kapitalının inkişafına zəmin yaradır.