Azərbaycan Texniki Universitetinin (AzTU) tələbəsi, Vətən müharibəsində qəhrəmancasına şəhid olan Anar Məmmədzadə 3 avqust 1999-cu ildə Zərdab rayonunda anadan olub.
Anar Məmmədzadə 2016-cı ildə AzTU-nun Maşınqayırma və robototexnika fakültəsinə daxil olub.
O, Vətən müharibəsi başlayana qədər Azərbaycan Silahlı Qüvvələrinin Bakıdakı "N" saylı hərbi hissəsində xidmət edib.
2020-ci il sentyabrın 27-də torpaqlarımızın işğaldan azad olunması üçün başlanan Vətən müharibəsində iştirak edib. Füzuli və Cəbrayılın azad olunması uğrunda gedən şiddətli döyüşlərdə qəhrəmanlıqlar göstərib. Anar Məmmədzadə oktyabrın 8-də Füzuli uğrunda gedən döyüşlərdə şəhidlik zirvəsinə yüksəlib.
Azərbaycan Prezidenti İlham Əliyevin Sərəncamlarına əsasən “Vətən uğrunda” və “Füzulinin azad olunmasına görə” medalları ilə təltif olunub.
AzTU-nun əməkdaşları şəhid Anar Məmmədzadənin doğum günündə onun məzarını ziyarət edib, xatirəsinə ehtiramlarını bildiriblər.
Allah rəhmət eləsin!
Şəhidlərimizin ruhu qarşısında baş əyirik!
