Rusiya hökuməti yeni tədris ili ərəfəsində hər məktəbli üçün 10 min rubl (təxminən 233 manat) məbləğində birdəfəlik yardımın göstərilməsi ilə bağlı qərar qəbul edib.

Maraqlıdır, belə bir təcrübə Azərbaycanda da tətbiq edilə bilərmi?

Tehsil.biz xəbər verir ki, mövzu ilə bağlı Sfera.az-a danışan təhsil eksperti Kamran Əsədov ölkəmizdə təhsilin pulsuz olduğunu qeyd etməklə yanaşı, ideyaya müsbət yanaşdığını ifadə edib:

"Ölkəmizdə orta məktəb şagirdlərinə dərsliklər pulsuz verilir. Bazar qiyməti ilə dəyərləndirsək, şagirdlər ümumi dəyəri 110 manat olan 9-11 adda pulsuz dərsliklərlə təmin edilir. Amma onu da nəzərə alaq ki, pandemiya dövründə bütün insanlar, o cümlədən, övladları orta məktəbdə oxuyan ailələr də əziyyət çəkiblər. Elə valideyn var ki, maddi vəziyyəti çox aşağı olduğundan övladlarının təhsillə bağlı ehtiyaclarını tam olaraq ödəyə bilmir. Bu mənada digər ölkələrdə olduğu kimi Azərbaycanda da belə ailələrə dövlət tərəfindən birdəfəlik müavinətlərin verilməsi daha yaxşı olardı".

Təhsil ekspertinin fikrincə, orta məktəb şagirdləri ilə bağlı Rusiyadakı təcrübəyə oxşar addımın atılması Azərbaycan dövlət büdcəsinin gücü çərçivəsindədir:

"Hesab edirəm ki, pandemiyanın yaratdığı çətinlikləri nəzərə almaqla məktəb ehtiyaclarını ödəmək üçün Azərbaycanda orta məktəb şagirdlərinin hər birinə mütləq olaraq birdəfəlik 100 və ya 200 manat həcmində vəsait ödənilməlidir. Bu onların problemlərini həll etməkdə mühüm addım olacaq".