“Vətən Müharibəsi Qəhrəmanı, şəhid Azər Yusifli Ağstafa rayonunun Böyük Kəsik kəndinin yeganə şəhididir. Həmçinin rayonda bu fəxri adla təltif olunan yeganə hərbçimizdir. Buna baxmayaraq, onun adı təhsil aldığı Böyük Kəsik kənd tam orta məktəbinə verilmir”.

Bu barədə “Qafqazinfo”ya şəhidin yaxını Nuran Allahverdiyev müraciət edib. Onun sözlərinə görə, Ağstafa rayon İcra Hakimiyyətinə bununla bağlı müraciət olunsa da, məsələ aylardır həllini tapmır:

“Azər Yusifli Vətən müharibəsi başlayarkən döyüş yoldaşlarına və kənddəki dostlarına şəhid olacağı təqdirdə adının təhsil aldığı, anasının müəllimə olaraq çalışdığı və ən əsası, heç kimin adı ilə adlandırılmayan Böyük Kəsik kənd tam orta məktəbinə verilməsini vəsiyyət edib. Biz onun şəhid olduğu vaxtdan etibarən bununla bağlı Ağstafa RİH-ə müraciət etmişik. İcra Hakimiyyətindən bizə bildirdilər ki, şəhidin adının məktəbə verilməsi ilə bağlı çalışırlar və məsələ həllini tapacaq. Şəhidin atası Nazim Yusifli həm də kəndin bələdiyyə sədridir. O özü də icra hakimiyyəti ilə əlaqədədir və tez-tez onlara bu məsələni xatırladırıq. Lakin Azərin şəhadətindən 10 ay keçməsinə baxmayaraq hələ də bir xəbər yoxdur”.

N. Allahverdiyevin sözlərinə görə, Prezidentin Vətən Müharibəsi Qəhrəmanlarının adlarının əbədiləşdirilməsi ilə bağlı sərəncamı olsa da, nəinki məktəbə adı verilməyib, onun adını daşıyan küçəyə büstü və ya barelyefi də qoyulmayıb. O həmçinin əlavə edib ki, şəhidin adının əbədiləşdirilməsi ilə bağlı bir sıra dövlət orqanlarına, o cümlədən, Təhsil Nazirliyinə müraciət edilib.

Məsələ ilə bağlı Ağstafa RİH başçısının müavini Lalə Eyyubova “Qafqazinfo”ya bildirdi ki, şəhid ailəsinin müraciəti ilə bağlı Nazirlər Kabinetinə rəsmi müraciət olunub: “Şəhidin adının əbədiləşdirilməsi ilə bağlı məsələ Nazirlər Kabinetinin səlahiyyətindədir. Ağstafa RİH tərəfindən bu ilin fevral ayında Nazirlər Kabineti qarşısında vəsatət qaldırılıb. Lakin hələ ki, Nazirlər Kabineti tərəfindən bununla bağlı qərar verilməyib”.

L. Eyyubova həmçinin əlavə edib ki, bütün şəhid ailələri, o cümlədən, şəhid A. Yusiflinin ailəsi də İcra Kakimiyyətinin diqqətindədir. Rayonun mərkəzi küçələrindən birinə Vətən Müharibəsi Qəhrəmanının adı verilib və bununla bağlı lövhə vurulub.

Təhsil Nazirliyindən “Qafqazinfo”nun sorğusuna cavab olaraq bildirilib ki, hazırda qeyd olunan məsələ ilə bağlı Nazirlər Kabinetindən hər hansı göstəriş yoxdur.

Qeyd edək ki, şəhid adlarının məktəblərə və küçələrə verilməsi Nazirlər Kabinetinin 15 yanvar 1994-cü il tarixli 10 saylı qərarı ilə, yəni “Şəhid adının əbədiləşdirilməsi və şəhid ailələrinə edilən güzəştlərin tətbiqi qaydalarının” təsdiq olunması haqqında qərarla təmin olunur. Həmin qərarın 3-cü bəndinin 3-cü müddəasında isə göstərilir ki, şəhid statusuna malik şəxsin adının küçələrə, meydanlara, təşkilatlara, müəssisələrə, hərbi və mülki gəmilərə verilməsi üçün yerli icra hakimiyyəti orqanları Nazirlər Kabineti qarşısında vəsatət qaldırmalıdır. Bundan əlavə, həmin şəhid ya Azərbaycanın Milli Qəhrəmanı olmalı, ya da Vətən uğrunda döyüşlərə görə ən azı iki ordenlə təltif olunmalıdır.

Xatırladaq ki, Azər Yusifli 1994-cü ildə Ağstafa Rayonu, Böyük Kəsik kəndində anadan olub. 2000 - 2011-ci illərdə sözügedən kənddə orta məktəbi bitirib. Dövlət Sərhəd Xidmətinin Çevik Hərəkat Dəstəsində kəşfiyyatçı olaraq çalışıb. Vətən müharibəsi zamanı 21 oktyabr tarixində Zəngilan şəhərində qəhrəmancasına şəhid olub. "Vətən uğrunda", "Cəbrayılın azad olunmasına görə" medalları və Vətən Müharibəsi Qəhrəmanı fəxri adı ilə təltif olunub.

Gülnar Əliyeva