Naxçıvan Dövlət Universiteti Xarici dillər fakültəsində xarici dillər üzrə ixtisasartırma kurslarının müdavimlərinə sertifikatlar verilib.
Tehsil.biz xəbər verir ki, tədbiri giriş sözüylə açan universitetin Tədris və tərbiyə işləri üzrə prorektoru Rafiq Rəhimov universitetdə tədris üçün yaradılan yüksək şəraitdən, elmdə və təhsildə qazanılan uğurlardan söhbət açıb. Qeyd olunub ki, ali və orta ümumtəhsil məktəbləri ilə belə əlaqəli tədbirlər bilik və təcrübə mübadiləsi, gələcək pedaqoji fəaliyyət prinsiplərinin düzgün müəyyənləşdirilməsi baxımından mühüm əhəmiyyət kəsb edir. Bildirilib ki, kursun keçirilməsində əsas məqsəd orta məktəb müəllimləri ilə universitet arasında əlaqələri genişləndirməkdir. Prorektor təlimdə iştirak edən hər kəsə öz təşəkkürünü bildirib.
Naxçıvan Muxtar Respublikası Təhsil nazirinin müavini Ovni Muradov bu kursun keçirilməsinin muxtar respublikada bu ixtisas üzrə müəllimlərin peşə bacarıqlarının möhkəmlənməsində xüsusi əhəmiyyətə malik olduğunu dilə gətirib.
Sonda kursu başa vuran müəllimlər universitet tərəfindən sertifikatla təltif ediliblər.
Qeyd edək ki, ötən tədris ilinin sonunda ali təhsil ocağında ingilis, rus, alman və fransız dilləri üzrə ixtisasartırma kursu keçirilib. İngilis və rus dili fənni üzrə 15 nəfərin iştirak etdiyi kursda 15 nəfər məqbul nəticə göstərib. Alman dili fənni üzrə 16 nəfər iştirak etdiyi kursda 14 məqbul nəticə, 15 nəfərin iştirak etdiyi kursda isə 11 məqbul nəticə əldə edilib.
Məlumat üçün onu da bildirək ki, kursdan sonra anket sorğuda iştirak edən müəllimlər müasir auditoriyalar, sinxron tərcümə, linqafon otaqlarından, dərslərin maraqlı və kurrikulum sisteminə uyğun keçmələrindən razı qaldıqlarını dilə gətiriblər. Həmçinin, ingilis dili müəllimləri arasında dinləmə və fonetikayla bağlı dərslər, rus dili müəllimlərinin rus yazıçı və şairlərin həyat və yaradıcılığına həsr olunmuş mövzuları, əsərlərindən seçmələr, alman dili müəllimlərinin şeir və mahnıların innovativ dərs üsulları ilə mənimsənilməsi, dil bacarıqlarının inkişaf etdirilməsi, fransız dili müəllimlərin internet resursları ilə tanışlıq bölməsi və internet üzrində yeni dərslərin materiallarının təqdim edilməsi təlimlərin daha maraqlı olmasına səbəb olub.
