Logo

Dövlət Gömrük Komitəsinin Akademiyasında Anım Günü tədbiri keçirilib

28.09.2021 16:37
IMG

Dövlət Gömrük Komitəsinin Akademiyasında 27 sentyabr - Anım Günü münasibətilə tədbir keçirilib.

Tehsil.biz xəbər verir ki, tədbirdə Dövlət Gömrük Komitəsinin rəhbərliyi, Akademiyanın rəhbərliyi və əməkdaşları, şəhid ailələri, qazilər və valideynlər, Akademiyanın Vətən müharibəsində iştirak edən məzunları və tələbələr iştirak edib.

Mərasimin əvvəlində Vətən uğrunda canlarını fəda etmiş bütün şəhidlərimizin xatirəsi bir dəqiqəlik sükutla yad edilib.

Mərasimdə çıxış edən Dövlət Gömrük Komitəsi sədrinin müavini, gömrük xidməti general-mayoru İqbal Babayev bildirib ki, bu gün Azərbaycan xalqı, bütün dünya azərbaycanlıları ölkəmizin ərazi bütövlüyü uğrunda canından keçən Vətən övladlarının xatirəsini ehtiramla anır. İqbal Babayev qeyd edib ki, xalqımız işğalla heç zaman barışmadı, yekun nəticədə Azərbaycan vətəndaşlarının 30 ilə yaxın davam edən torpaq həsrətinə son qoyuldu. Prezident, Müzəffər Ali Baş Komandan İlham Əliyevin rəhbərliyi ilə rəşadətli ordumuz işğal altındakı torpaqlarımızı 44 gün ərzində geri qaytardı. Bu tarixi qələbə isə şəhidlərimizin, qazilərimizin qanı, canı bahasına başa gəldi. Buna görə indi hər bir Azərbaycan vətəndaşı bizə qələbə sevinci yaşadan şəhidlərimizə və qazilərimizə borcludur.

Vətən müharibəsində Dövlət Gömrük Komitəsinin 60 nəfər əməkdaşının da iştirak etdiyini diqqətə çatdıran Komitə sədrinin müavini onlardan Ülvi Hacıyevin şəhadətə qovuşduğunu, 9 nəfərinin isə yaralandığını bildirib. İqbal Babayev vurğulayıb ki, şəhidlərimiz, qazilərimiz heç zaman unudulmayacaq, daim diqqət mərkəzində olacaqlar.

Dövlət Gömrük Komitəsinin Akademiyasının rəisi, gömrük xidməti general-mayoru Qulu Novruzov çıxışında bildirib ki, Vətən müharibəsi bizim şanlı tariximiz, şəhidlərimiz və qazilərimiz qürur mənbəyimizdir. Xalqımız bu müharibədə əzm və iradə, birlik və həmrəylik nümayiş etdirərək, düşmənə sarsıdıcı zərbələr endirib. Vətən müharibəsində əldə edilən böyük qələbə xalqımızın, xüsusilə də gənc nəslin milli vətənpərvərlik ruhunun yüksək olduğunu, dövlət başçısı və xalq birliyinin sarsılmazlığını, millətimizin Vətən, dövlət sevgisini parlaq şəkildə nümayiş etdirdi.

Qulu Novruzov diqqətə çatdırıb ki, bu mərasimdə həm Akademiyanın Vətən müharibəsində iştirak edən məzunları, həm də Akademiyaya yeni qəbul olunan tələbələr və könüllü gömrükçülər iştirak edir. Vətən müharibəsinin qəhrəmanları gənclərimiz üçün vətənpərvərlik və mübarizlik nümunəsidir. Əsgərlərimiz cəbhə xəttində əllərindən gələni etdikləri kimi tələbələrimiz də əldə edəcəkləri bilik və bacarıqlarıyla Azərbaycanın uğurlu inkişafı prosesinə fəal şəkildə qoşulacaq, dövlətin onlara olan etimadını doğruldacaqlar.

Daha sonra mərasimdə şəhid gömrükçü Ülvi Hacıyevin anası Həmidə Qurbanova çıxış edib. Ülvinin istər orta və ali məktəb illərində, istərsə də çalışdığı təşkilatlarda hörmət qazandığını qeyd edən şəhid anası övladının hər zaman Vətənini hər şeydən üstün tutduğunu vurğulayıb. 26 yaşlı Ülvinin itkisinin bir ana kimi ona ağır olduğunu bildirən Həmidə xanım, eyni zamanda, övladı ilə fəxr etdiyini deyib. Həmidə Qurbanova Gömrük Akademiyasına yeni qəbul olunan tələbələrə təhsildə uğurlar arzulayıb, onlara hər zaman vətənin və xalqın marağını uca tutmağı tövsiyə edib. Şəhid anası qeyd edib ki, müstəqil Azərbaycan dövləti və ona sadiq vətəndaşlar olduqca şəhidlərimizin də xatirəsi əbədi yaşayacaq.

Şəhid Tahir Əliyevin atası Mahir Əliyev şəhidlərimizin qanının yerdə qalmadığını, torpaqlarımızın işğaldan azad olunması kimi tarixi bir qələbənin qazanıldığını və bu qələbədə hər bir əsgərin Vətən qarşısındakı borcunu şərəflə yerinə yetirdiyini söyləyib. Şəhid atası bildirib ki, övladının da ən böyük arzusu torpaqlarımızın azad olunması idi. Məhz bu istək onu ön cəbhəyə - Vətən torpaqları uğrunda döyüşlərə aparıb. Şəhid ailələrinə, qazilərə xalqımızın və dövlətimizin qayğısından razılığını ifadə edən Mahir Əliyev vurğulayıb ki, Vətən, torpaq uğrunda şəhid olan oğullarımızla fəxr etməli, qürur duymalıyıq.

2021-ci ildə Akademiyaya ən yüksək balla qəbul olmuş informasiya təhlükəsizliyi ixtisasının I kurs tələbəsi Fəridə Daşdəmirovanın anası Vəfa Daşdəmirova çıxışında şəhidlərimizin, qazilərimizin və ümumiyyətlə qəhrəman əsgərlərimizin gənc nəsil üçün qürur və ilham mənbəyi olduğunu vurğulayıb. Bütün tələbələri yeni tədris ili münasibətiylə təbrik edib, məhz şəhidlərimizin və qazilərimizin sayəsində onların artıq qalib dövlətin tələbələri olduğunu bildirib.  

Mərasimdə Akademiyanın Vətən müharibəsində iştirak edən məzunlarından biri olan Elvin Qazaxov və Vətən müharibəsi qazisi Seyidəkbər Xaliqov çıxış edərək onlara göstərilən etimada və dəstəyə görə təşəkkür ediblər. Onlar Vətən borcunu yerinə yetirmək imkanına görə şərəf duyduqlarını, şəhid olan qardaşlarının xatirəsinin onların qəlbində daim yaşayacağını bildiriblər.

Sonra könüllü gömrükçülərin ifasında şəhidlərimizin xatirəsinə həsr olunmuş bədii kompozisiya təqdim olunub.

Mərasimdən sonra Komitə və Akademiya rəhbərliyinin şəhid ailələri və qazilərlə xüsusi görüşü keçirilib. Şəhid ailələrinə və qazilərə xatirə hədiyyələri təqdim edilib. 

Xəbər lenti