Azərbaycan Texnologiya Universitetində növbəti tyutor hazırlığı kurslarını başa vurmuş tyutorlara (tələbənin akademik məsləhətçisi) sertifikatların təqdimetmə mərasimi keçirilib. 

Tehsil.biz xəbər verir ki, tədbirdə Azərbaycan Texnologiya Universitetin rektoru vəzivəsini müvəqqəti icra edən dosent Yaşar Ömərov gənc tyutorlar qarşısında çıxış edərək onlara məsləhət və tövsiyyələrini verib. Bildirib ki, tyutor kursları Boloniya prosesinin baza prinsiplərinin öyrənilməsilə əlaqədar təşkil edilir. “COVİD-19 pandemiyasının yaratdığı çətinliklərə baxmayaraq tyutor hazırlığının təşkili universitetin tədris həyatında əlamətdar hadisədir. Bu kursu müvəffəqiyyətlə başa vurduğunuz üçün hər birinizi təbrik edirəm! Hər bir tyutorun başlıca vəzifəsi tələbələrin problemini zamanında həll etmək, eləcə də tələbənin fikirlərinə önəm verməkdən ibarətdir. Öz missiyanızı yerinə yetirərkən diqqətli olmalı, nöqsanlara yol verməməlisiniz”-deyə Yaşar Ömərov qeyd edib. 

Daha sonra müdavimlərə I və II dərəcəli sertifikatlar təqdim edilib. Qeyd edək ki, bu dəfəki tyutor kurslarında 18 gənc iştirak edib. Onlar 3 ay (31 may-30 avqust) ərzində 300 saatlıq təlimlərə cəlb olunublar.