Qazaxıstanın Miras Universitetinin rektoru professor Bolat Mirzaliyev Azərbaycan Dövlət İqtisad Universitetinin (UNEC) rektoru professor Ədalət Muradovla görüşüb.

Tehsil.biz xəbər verir ki, görüşdə professor Ədalət Muradov UNEC-in tədris prosesi, beynəlxalq əlaqələri barədə məlumat verib. UNEC-in dünyanın bir çox nüfuzlu universitetləri ilə əməkdaşlıq etdiyini, ikili diplom, mübadilə və birgə diplom proqramları həyata keçirdiyini diqqətə çatdırıb.

Professor Bolat Mirzaliyev Miras Universiteti barədə məlumat verdikdən sonra hər iki universitet arasında əməkdaşlıq imkanları müzakirə olunub.

Müzakirələrdən sonra UNEC ilə Miras Universiteti arasında əməkdaşlığa dair anlaşma memorandum imzalanıb.

Memoranduma əsasən, hər iki universitet arasında müəllim, tələbə, magistr və doktorantların mübadiləsi, layihə və proqramların işlənib-hazırlanması, birgə elmi-tədqiqatların aparılması, ikili diplom və dərəcəli proqramların tətbiqi, beynəlxalq konfransların keçirilməsi və digər sahələrdə əməkdaşlıq nəzərdə tutulub.