Azərbaycan Dövlət Aqrar Universitetində (ADAU) BMT-nin Ərzaq və Kənd Təsərrüfatı Təşkilatı (FAO) və Kənd Təsərrüfatı Nazirliyi (KTN) yanında Aqrar Kredit və İnkişaf Agentliyi (AKİA) ilə birgə 16 oktyabr “Ümumdünya Qida Günü”nə həsr olunmuş “Qlobal ərzaq təlükəsizliyində aqrar təhsilin və təlimin rolunun gücləndirilməsi” mövzunda tədbir təşkil olunub.
Tehsil.biz xəbər verir ki, tədbir torpaqlarımızın bütövlüyü uğrunda canından keçən şəhidlərin əziz xatirəsinin 1 dəqiqəlik sükutla yad edilməsi ilə başlayıb.
Universitetin Tədris işləri üzrə prorektoru, dosent Anar Hətəmov tədbir iştirakçılarını salamlayaraq bildirib ki, bu günün əsas məqsədi dünyada aclıqdan və qida çatışmazlığından əziyyət çəkən insanlara, ərzaq itkisi və tullantısının azaldılmasına dair qlobal maarifləndirmənin aparılması və hər kəs üçün sağlam qidalanmanın təmin edilməsinin vacibliyini vurğulamaqdır.
Aqrar Kredit və İnkişaf Agentliyinin Beynəlxalq təşkilatlar və maliyyə qurumları ilə əməkdaşlıq sektorunun müdiri Teymur Nağıbəyli AKİA tərəfindən icra olunan “Aqrar Məşğulluğun Artırılması - AMAL” və “Qadınların iqtisadi gücünün artırılması - WEP” layihələri, FAO-nun Azərbaycan Ofisinin Əməliyyatlar üzrə mütəxəssisi Elməddin Namazov FAO - Azərbaycan tərəfdaşlıq proqramı çərçivəsındə icra olunan layihələr barədə, Aqrar Tədqiqatlar Mərkəzinin Tədqiqatlar Departamentinin rəhbəri Pərviz Əliyev “Dayanıqlı ərzaq sistemləri”, Türkiyə Cümhuriyyəti Ege Universitetinin professoru İsmail Türkan “Post-genom dövründə bitki biologiyasının inkişafı”, ADAU-nun Bağçılıq kafedrasının dosenti Abbas İsmayılov “Biomüxtəlifliyin qorunmasının qida təhlükəsizliyində rolu” mövzusunda çıxışlar ediblər.
Sonra tələbələri maraqlandıran suallar mütəxəssislər tərəfindən cavablandırılıb.
Həmçinin, tədbirdə FAO-nun Azərbaycandakı Tərəfdaşlıq və Əlaqələndirmə Ofisinin, Kənd Təsərrüfatı Nazirliyi yanında Aqrar Kredit və İnkişaf Agentliyinin və Aqrar Tədqiqatlar Mərkəzinin əməkdaşları, Azərbaycan Dövlət Aqrar Universitetinin, o cümlədən Ege Universitetindən dəvət olunmuş bir qrup müəllimlər, iş adamları və tələbələr iştirak ediblər.
