Vətən müharibəsində qəhrəmanlıqlar göstərərək şəhidlik zirvəsinə ucalmış Osman Cəfər Elsevər oğlunun, Süleymanov Emin Bəhmən oğlunun və Səfərli Cavid Xalıq oğlunun xatirəsini əbədiləşdirmək məqsədilə İmişli şəhər 5 saylı məktəb - liseyin həyətində inşa edilmiş bulaq - kompleksinin açılışı olub.
Tehsil.biz xəbər verir ki, açılış mərasimində İmişli Rayon İcra Hakimiyyətinin başçısı Elçin Rzayev, hüquq-mühafizə orqanlarının rəhbərləri, İmişli Rayon Təhsil Şöbəsinin rəhbərliyi, şəhid valideynləri, məktəbin müəllimləri və şagirdləri iştirak ediblər.
Mərasimdə Elçin Rzayev, İmişli RTŞ-nin müdiri Ələmdar Quliyev, məktəb-liseyin direktoru Validə Zülfüqarova çıxış ediblər. Çıxış edənlər 44 günlük Vətən müharibəsində Prezident, Silahlı Qüvvələrin Ali Baş Komandanı İlham Əliyevin rəhbərliyi ilə müzəffər Azərbaycan Ordusunun əsgər və zabitlərinin, o cümlədən İmişli döyüşçülərin qəhrəmanlıqlarından danışıblar. Ölkəmizdə müharibə iştirakçılarına və şəhid ailələrinə göstərilən diqqət və qayğıya görə dövlətimizin başçısına minnətdarlıqlarını bildiriblər.
Tədbirdə şagirdlərin ifasında vətənpərvərlik mövzusunda şeirlər ifa olunub.