Ucarın Təzə Şilyan kəndində ötən əsrin 60-cı illərində tikilən uşaq bağçası yararsız və qəzalı vəziyyətdədir.  

Həmin ərəfələrdə əhalinin sayı az olsa da, hazırda kənddə 4 minə yaxın sakin yaşayır. Bağçanın ümumi tutumu isə cəmi 20 yerlikdir. Bundan başqa aradan keçən illər ərzində binanın, demək olar ki, istismar müddəti başa çatıb.

Kənddə elə adamlar var ki, uzun illər öncə, özləri uşaq ikən həmin bağçaya gediblər, amma hazırkı vəziyyət ürəkaçan olmadığından övladlarını ora göndərməkdən imtina edirlər.

Bağçanın müdiri Dilşad Abdurrəhmanova deyir ki, məsələ ilə bağlı bir neçə dəfə rəsmi qurumlardan binaya baxış keçirilib və aidiyyəti qurumlara müraciət edilib.

Kənd bələdiyyəsinin sədri Tahir Kərimov isə məsələnin aidiyyəti qurumların diqqətində olduğunu və növbəti ilin martında bağçanın yenidən tikintisinə başlanılacağını bildirib.

Ətraflı Baku TV-nin süjetini təqdim edirik: