“Uzun illərdir Azərbaycan və Qətər arasında mədəniyyət və təhsil əlaqələri möhkəmləndirilir”.

Bunu “Report”a Qətər Milli Kitabxanasının icraçı direktoru xanım Tan Huism deyib.

“Azərbaycan Milli Kitabxanasının direktoru professor Kərim Tahirovla görüşmək çox xoş oldu. Biz, icmalarımızın dəstəklənməsi üzrə cari və gələcək birgə fəaliyyətimiz barədə səmərəli müzakirə apardıq. Bilik mübadiləsi, təhsil və mədəniyyət sahələri üzrə potensial imkanları müzakirə etdik”, - o deyib.

Qətər Milli Kitabxanasının icraçı direktoru onu da əlavə edib ki, bu yaxınlarda imzalanmış Əməkdaşlıq haqqında Memorandum əsas diqqəti kitab və bilik mübadiləsinə ayırmaqla ölkələr arasında mədəni əlaqələrin möhkəmləndirilməsinin zəruriliyini əks etdirir. “Qətər Kitabxanası üzvlərinin Azərbaycan və Qətərin mədəniyyəti və tarixi haqqında geniş bilik əldə etmələri üçün bu cür imkanlar təqdim etməkdə davam edəcək, bununla da iki ölkənin yaxınlaşmasına səy göstərəcəyik”, - T.Huism vurğulayıb.

“Ötən il Azərbaycanın Dohadakı səfirliyi Qətər Milli Kitabxanasına ingilis və ərəb dilində 70 kitab hədiyyə etmişdi. Dekabr ayında Qətər Milli Kitabxanası və Azərbaycan səfirliyi böyük şair və mütəfəkkir Nizami Gəncəvinin anadan olmasının 880 illiyinə həsr olunmuş tədbir keçirib. Bu tədbir ölkələrin çoxillik ümumi mədəni, dini və tarixi dəyərlərinin təcəssümü idi”, - kitabxana direktoru xatırladıb.

İcraçı direktor iki ölkənin milli kitabxanaları arasında əməkdaşlıqla bağlı gələcək birgə planları bölüşüb: “Qətər Milli Kitabxanası kolleksiyamızın yeni kitablarla zənginləşməsi üçün səylərini davam etdirəcək. Qətər və Azərbaycan xalqlarını yaxınlaşdırmaq üçün yaxın aylarda mədəni irs, ədəbiyyat və poeziya sahəsində əlavə əməkdaşlıq istiqamətləri axtarmaqda davam edəcəyik”.