Nəsimi rayonundakı "Şəms" körpələr evi-uşaq bağçasında Xocalı soyqırımının 30-cu ildönümü ilə əlaqədar anım tədbiri keçirilib.
Tehsil.biz xəbər verir ki, əvvəlcə Xocalı soyqırımı qurbanlarının və Azərbaycanın azadlığı, ərazi bütövlüyü uğrunda canından keçən şəhidlərimizin xatirəsi bir dəqiqəlik sükutla yad edilib, Azərbaycan Respublikasının Dövlət Himni səsləndirilib.
Uşaq bağçasının müdiri İradə İbrahimova çıxış edərək 1992-ci il fevralın 25-dən 26-na keçən gecə erməni quldur dəstələrinin Xocalı şəhərində dinc əhaliyə, o cümlədən qadın, uşaq və ahıl insanlara qarşı törətdikləri qırğından danışıb. O vurğulayıb ki, həmin məşum gecədə 613 nəfər vəhşicəsinə qətlə yetirilib. Onlardan 63-ü uşaq, 106-sı qadın və 70-i qocadır. Bundan başqa, 1275 nəfər girov götürülüb, itkin düşmüş 150 dinc sakinin taleyindən indiyədək xəbər yoxdur. Xocalıda baş verənlər XX əsrdə bəşəriyyətə qarşı törədilmiş ən dəhşətli cinayətlərdən biridir. Xocalının işğalından 30 il keçməsinə baxmayaraq erməni faşistlərinin bu şəhərin əliyalın sakinlərinə qarşı törətdikləri vəhşiliklər unudulmur. Əksinə, illər keçdikcə qaysaq bağlamayan yaralar göynəyir, xalqımıza qarşı soyqırımı törədənlərə nifrət artır.
“44 gün davam edən müharibədə qalib gələn Azərbaycan Ordusu Ermənistan silahlı birləşmələrini darmadağın etməklə 30 il əvvəl qətlə yetirilən 613 xocalılı sakinin qisasını aldı. Azərbaycan Prezidenti, Müzəffər Ali Baş Komandan İlham Əliyevin, Heydər Əliyev Fondunun Xocalı həqiqətlərinin beynəlxalq ictimaiyyətə çatdırılması istiqamətində apardığı təbliğatı döyüş meydanında düşməni təslimçiliyə məcbur etməklə davam etdirən, “qana-qan” deyən Azərbaycan əsgərlərinin işğaldan azad edilmiş ərazilərdə dalğalandırdıqları üçrəngli bayrağımız soyqırımı qurbanlarına xalqımızın vəfa borcudur”, - deyə Vüsalə Mustafayeva əlavə edib.
Bağçanın psixoloqu Nəzakət Həsənli də çıxışında uşaqların milli ruhda tərbiyə olunması, Vətənə, doğma torpağa sədaqət və məhəbbət hisslərinin gücləndirilməsi istiqamətində bağçada görülən işlərin bundan sonra da davam etdiriləcəyini vurğulayıb.
Tərbiyəçilər İmaməliyeva Arzu, Məmmədova Zülfiyyə, Rəsulova Aytən, Hüseynova Mehri və başqaları xalqımıza qarşı törədilən soyqırımı barədə həqiqətləri ilk öncə övladlarımıza, sonra bütün dünyaya çatdırmağın, gələcək nəsillərə əyani surətdə göstərməyin və ictimaiyyət arasında təbliğ etməyin vacibliyini xüsusi qeyd ediblər.
Sonda bağçanın fidanları tərəfindən Xocalı həqiqətlərini əks etdirən ədəbi-bədii kompozisiya təqdim olunub. Balaca istedadların çıxışları böyük maraqla qarşılanıb.
