"Azərbaycanın bütün bölgələrində əsaslı tikintiyə və təmirə ehtiyacı olan məktəblər var".

Tehsil.biz xəbər verir ki, bunu jurnalistlərə açıqlamasında təhsil naziri Emin Əmrullayev deyib.

Onun sözlərinə görə, Təhsil Nazirliyində həmin məktəblərin siyahısı var: "Bu məktəblər müəyyən meyarlar əsasında kateqoriyalara bölünüblər. Ölkəmizdə 4500-ə yaxın məktəbin 3500-dən bir az artığı tədrisə yararlıdır. Onlar son illər ərzində yenidən tikilib və ya əsaslı təmir olunub. Əsasən 200-300 nəfərlik kənd məktəblərimizlə bağlı problemlər var, onlar modul tipli məktəblərlə əvəz olunur".

Nazir deyib ki, əsasən daha böyük məktəbləri yenidən tikməyə çalışırlar: "Çünki onlarda şagird tutumu çox olur. Hər il bir regionun bütün məktəblərini deyil, hər regionda təmirə ehtiyacı olan bir-iki məktəbi plana uyğun yeniləyirik.

Ən acınacaqlı vəziyyətdə olan məktəbdən başlayıb irəliyə doğru gedirik. Problem bir günə, bir ilə həll oluna bilməz. İşlər mərhələli şəkildə aparılır" .