27 aprel - 27 may tarixlərində 1 iyun-Uşaqların Beynəlxalq Müdafiəsi Gününə həsr olunmuş “Çıxdı günəş, doldu cahan nur ilə” adlı respublika uşaq yaradıcılıq festival-müsabiqəsinə start verilib.
Tehsil.biz xəbər verir ki, festival-müsabiqə Təhsil Nazirliyinin dəstəyi və 1 nömrəli Uşaq-Gənclər İnkişaf Mərkəzinin təşkilatçılığı ilə sağlamlıq imkanları məhdud uşaqlar üçün xüsusi təhsil, ümumi təhsil və məktəbdənkənar təhsil müəssisələrinin şagird və dərnək üzvləri arasında keçirilir.
Festival-müsabiqənin keçirilməsində məqsəd uşaq və gənclərin yaradıcılıq qabiliyyətlərini inkişaf etdirmək, onların istedad və bacarıqlarını üzə çıxarmaq, xüsusi qayğıya ehtiyacı olan uşaqların cəmiyyətə inteqrasiya olunmasına şərait yaratmaq, uşaqlarda nitq mədəniyyətinə, bədii qiraətə, musiqiyə və incəsənətə olan marağı daha da artırmaqdan ibarətdir.
Müsabiqə 3 yaş qrupunda (6-9, 10-13, 14-17) bədii qiraət, təsviri- tətbiqi sənət, instrumental ifa, mahnı və rəqs nominasiyaları üzrə keçirilir. İştirakçı yalnız bir nominasiya üzrə iştirak edə bilər.
I mərhələ - 27 aprel-20 may 2022-ci il. Bu mərhələdə rayon (şəhər) ümumtəhsil məktəbləri və məktəbdənkənar təhsil müəssisələrindən hər nominasiya üzrə seçilmiş nömrələr həmin rayonun Uşaq-Gənclər İnkişaf Mərkəzinə göndərilir və münsiflər heyəti tərəfindən seçilmiş birinci yerlərin qalibləri ümumiləşdirilərək zonalar üzrə təyin olunmuş ünvana təqdim edilir;
II mərhələ - 23 may-27 may 2022-ci il. Bu mərhələdə 1 nömrəli Uşaq-Gənclər İnkişaf Mərkəzinin əməkdaşları və təyin olunmuş zonalar üzrə münsiflər heyətinin iştirakı ilə festival-müsabiqəyə qatılmış şagirdlərin seçimi aparılır. Əsasnamənin tələblərinə uyğun olaraq zona üzrə iştirak edən şagirdlər arasından seçilən I, II, III yerlərin qalibləri yekun mərhələdə iştirak etmək hüququ qazanır.
Hər yaş qrupu və nominasiya üzrə II mərhələnin qalibləri haqqında məlumat Təhsil Nazirliyi 1 nömrəli Uşaq- Gənclər İnkişaf Mərkəzinin elektron ünvanına ([email protected]) göndərilməlidir.
Festival-müsabiqədə I, II, III yerin qalibləri və fəal iştirakçılar diplomlarla təltif olunacaq.
Qeyd edək ki, festival-müsabiqə ilə bağlı sualı olanlar (+994) 12 597 13 42 və (+994) 50 367 47 04 telefon nömrələri ilə əlaqə yarada bilərlər.
