Azərbaycan Texnologiya Universitetində Milli lider Heydər Əliyevin 99 illiyi münasibətilə silsilə tədbirlər davam edir. 

Tehsil.biz xəbər verir ki, bu günlərdə bir qrup gənclər və UTECA könüllüləri universitetdə fəaliyyət göstərən Heydər Əliyev Muzeyini ziyarət ediblər. 

Gəncə şəhər Gənclər Evinin direktoru Amil Qurbanovun da qatıldığı ekskursiyada rektorun tədris və sənaye işləri üzrə müşaviri dos.Aqil Eyvazov gənclərə muzey barədə məlumat verib. Bildirib ki, dahi şəxsiyyətin həyat və fəaliyyətini əks etdirən muzey 2005-ci ildə yaradılıb.  Burada onun xalqımızın tarixinə, mədəniyyətinə, incəsənətinə göstərdiyi diqqət və qayğısını əks etdirən fotoşəkillər, tarixi sənədlər və digər dəyərli eksponatlar yer alır. Azərbaycan Texnologiya Universitetinin də  50 il əvvəl məhz Heydər Əliyevin təşəbbüsü ilə yaradıldığını xatırladan A.Eyvazov xilaskarın Azərbaycançılıq məfkurəsindən bəhs edib. 

Ekskursiya zamanı Gənclər Evinin direktoru Amil Qurbanov da tələbələrlə fikirlərini bölüşüb. Qeyd edib ki, dahi rəhbərin vətənimizin suverenliyi, ölkəmizin düşdüyü bəlalardan xilası, Azərbaycanın inkişafı naminə mübarizədə əvəzolunmaz xidmətləri onu hələ sağlığında xalqımızın Ümummilli liderinə çevirib: “Heyrətamiz idarəçilik istedadına, mətin iradəyə və böyük əzmkarlığa malik Ulu öndərimiz Azərbaycana rəhbərliyinin birinci dövründə ölkəmizi tənəzzül burulğanından çıxararaq respublikamızı qısa vaxt ərzində qabaqcıl və nüfuzlu ölkə səviyyəsinə yüksəldə bilib”. 

Muzeylə tanışlıqdan sonra Logistika Mərkəzində “Heydər Əliyev – Dahi şəxsiyyət” sənədli filmi izlənilib.