Logo

BMU-İNHA ikili diplom proqramı ilə bağlı növbəti maarifləndirici görüş təşkil olunub

18.05.2022 14:41 338 baxış
IMG

Bakı Mühəndislik Universiteti (BMU) və Cənubi Koreyanın İNHA Universiteti arasında icra olunan ikili diplom proqramı çərçivəsində növbəti maarifləndirici tədbir Sumqayıtda Texniki və Təbiət Elmləri Liseyində keçirilib.

Tehsil.biz xəbər verir ki, liseyin şagirdləri ilə görüşdə BMU-nun Beynəlxalq əlaqələr üzrə prorektoru, dosent Manafəddin Namazov universitetdə tədris olunan ixtisaslar barədə geniş məlumat verib. Ali təhsil ocağında İnformasiya texnologiyaları, Kibertəhlükəsizlik, Elektroenergetika mühəndisliyi, Mexanika mühəndisliyi, Biznesin idarə edilməsi və s. ixtisaslar üzrə mütəxəssis hazırlığının həyata keçirildiyini bildirən prorektor bu ixtisasların hər birində rəqəmsal bacarıqların çox böyük yer tutduğunu fikirlərinə əlavə edib. M.Namazov informasiya texnologiyaları və yaxın fənlərin tədrisi ilə məşğul olan müəllimlərin, eləcə də BMU-da bu sahədə təhsil alan tələbələrin bilik və bacarıqlarının artırılması məqsədilə “Mobil Tətbiqlər və Oyun Dizaynı” ixtisası üçün laboratoriya təşkil edildiyini də vurğulayıb.

M.Namazov işğaldan azad olunmuş ərazilərdə aparılan quruculuq işləri ilə əlaqədar energetiklərə, elektrik və elektronika mühəndislərinə böyük ehtiyac duyulduğunu, BMU-İNHA ikili diplom proqramına uyğun olaraq İnformasiya texnologiyaları, İnşaat mühəndisliyi, Elektronika mühəndisliyi və Elektrik mühəndisliyi ixtisasları üzrə yüksəkixtisaslı kadr hazırlığının həyata keçirildiyini nəzərə çatdırıb.

Sonra görüşdə BMU-İNHA ikili diplom proqramının direktoru Humay Cəfərli təqdimatla çıxış edib. BMU ilə İNHA Universiteti arasında bakalavriat səviyyəsində mühəndislik ixtisasları istiqaməti üzrə ikili diplom proqramının 2020/2021-ci tədris ilindən həyata keçirildiyini söyləyən H.Cəfərli proqram, əldə olunan nəticələr haqqında məlumat verib.

Dünyaca məşhur şirkətlərin Cənubi Koreyada yerləşdiyini fikirlərinə əlavə edən H.Cəfərli proqramın tələbələr üçün yaratdığı üstünlüklərə toxunub. Bildirib ki, tələbələr hər iki universitet tərəfindən sinxronlaşdırılan tədris planı əsasında 3 il Azərbaycanda, 1 il isə Cənubi Koreyada təhsil alacaq və sonda iki diploma sahib olacaq. Tələbələrin Cənubi Koreyada 3 həftəlik yay məktəbində iştirakını, eləcə də magistratura və doktorantura təhsillərini orada təqaüdlə davam etdirmək imkanını önə çəkən H.Cəfərli beynəlxalq təcrübəni mənimsəyərək qeyd olunan mühəndislik sahələrində onların müasir bilik və bacarıqlara yiyələnəcəklərindən söz açıb.

H.Cəfərli çıxışında proqrama aid olan ixtisaslar, keçid balları, qəbul kvotası, tədris dili, qəbul şərtləri və müraciət forması haqqında zəruri informasiyaları məktəblilərin diqqətinə çatdırıb.

İNHA Universiteti barədə məlumat verən ikili diplom proqramının idarə edilməsi üzrə bölmə rəhbəri Hyunjin Yang ali təhsil ocağının Cənubi Koreyanın mühəndislik sahəsində lider universitetlərindən olduğunu vurğulayıb. O, Azərbaycan dövləti tərəfindən tam olaraq maliyyələşən proqramın yaratdığı imkanlardan bəhs edib və bunu tələbələr üçün yaradılan gözəl fürsət kimi dəyərləndirib. Bölmə rəhbəri çıxışında İNHA Universitetində mövcud olan müxtəlif təqaüd proqramlarından da danışıb.

Liseyin Təlim-tərbiyə işləri üzrə direktor müavini Rasim Süleymanov bu kimi görüşlərin şagirdlərin ixtisas və universitet seçiminə yardımçı olacağını vurğulayıb.

Daha sonra məktəbliləri maraqlandıran suallar cavablandırılıb.

Tədbir çərçivəsində liseyin direktoru Rüxsarə Məmmədova ilə də görüş keçirilib və bu qəbildən olan tədbirlərin təşkili, həmçinin “Açıq qapı” günlərində lisey şagirdlərinin iştirakı məsələləri müzakirə olunub.

Xəbər lenti