20 iyun 2022-ci il tarixində Azərbaycan Respublikasının Mədəniyyət Nazirliyinin təşkilatçılığı, Gəncə şəhər İcra Hakimiyyətinin, Gəncə Regional Mədəniyyət İdarəsinin, F.Əmirov adına Gəncə Dövlət Filarmoniyasının və Azərbaycan Dövlət Akademik Opera və Balet Teatrının dəstəyi ilə Gəncə Dövlət Filarmoniyasında Fikrət Əmirovun 100 illik yubileyinə həsr olunmuş “Min bir gecə” 2 pərdəli balet nümayiş etdirilib.

Tehsil.biz xəbər verir ki, tamaşada Gəncə şəhər İcra Hakimiyyətinin başçısı Niyazi Bayramov, Azərbaycan Respublikasının Mədəniyyət Nazirliyinin Musiqi sektorunun müdiri, sənətşünaslıq üzrə fəlsəfə doktoru Vüqar Hümbətov, Gəncə Regional Mədəniyyət İdarəsinin rəisi Vasif Cənnətov, millət vəkili Müşfiq Cəfərov, Türkiyə Cümhuriyyətinin Gəncədəki baş konsulu Zeki Öztürk, mədəniyyət işçiləri, şəhər ziyalıları və sakinləri iştirak edib.

Fikrət Əmirovun “Min bir gecə” nağıllarının motivləri əsasında hazırlanmış 2 pərdəli baletin Libretto müəllifləri Əməkdar İncəsənət xadimi, SSRİ Dövlət mükafatı laureatı Nailə Nəzirova, Maqsud və Rüstəm İbrahimbəyovlar, truppanın bədii rəhbəri, Xalq artisti, “Zirvə”, “Qızıl Dərviş” və “Humay” mükafatları laureatı Kamilla Hüseynova, quruluşçu rəssam, Xalq rəssamı, SSRİ Dövlət mükafatı laureatı Toğrul Nərimanbəyov, geyim üzrə rəssam, Xalq artisti Tahir Tahirov, tamaşanı idarə edir Əməkdar artist Yuri Lobaçev.

Tamaşada əsas partiyaları Əməkdar artistlər Anar Mikayılov (Şəhriyar), Nigar İbrahimova (Şəhrizad) və Cəmilə Kərimova (Nuridə) ifa edib. Digər rollarda isə balet truppasının aparıcı solistləri Seymur Qədiyev (Nuridənin sevimli qulu), Ayan Eyvazova (Gözəl Budur), Timur Oduşev (Ələddin), İslam Məmmədov (Quldurbaşı), Dinara Şirinova (Qız), Liana Mirabdullayeva (Mərcanə), İntiqam Məmmədov (Rux quşu) və başqaları çıxış edib.