Bakı Şəhər Mədəniyyət Baş İdarəsinin Yasamal rayon Mərkəzləşdirilmiş Kitabxana Sisteminin (MKS) 4 nömrəli filialının birgə təşkilatçılığı və Gəncə Regional Mədəniyyət İdarəsi Samux rayon Heydər Əliyev Mərkəzinin təşəbbüsü ilə Xurşidbanu Natəvanın 190 illiyinə həsr olunmuş virtual görüş keçirilib.

"Tehsil.biz"in məlumatına görə, görüşdə Gəncə, Şirvan, Şabran, Zərdab, Hacıqabul, Cəlilabad rayonlarının Heydər Əliyev mərkəzlərinin , mərkəzləşdirilmiş kitabxana sistemlərinin direktorları və əməkdaşları, Samux MKS-nin əməkdaşları iştirak ediblər.

Samux rayon Heydər Əliyev Mərkəzinin direktoru Nuranə Həsənova ümummilli lider Heydər Əliyevin siyasi kursunun layiqli davamçısı Prezident İlham Əliyevin ədəbiyyatımıza göstərdiyi diqqət və qayğıdan söz açıb, dövlət başçısının bu tarixi Sərəncamını əlamətdar hadisə kimi dəyərləndirib.

Virtual görüşdə Yasamal rayon MKS-nin 4 saylı filialının əməkdaşları İradə Hüseynova, Zərəngiz Mansurova çıxış edərək, şair, rəssam, ictimai xadim olan Xurşidbanu Natəvanın həyat və yaradıcılığı haqqında məlumat veriblər.

Zərəngiz Mansurova Xurşidbanu Natəvanın Azərbaycan ədəbiyyatına, mədəniyyətinə, incəsənətinə verdiyi töhfələrdən, xalqın rifah halının, xoş güzəranının, məişətinin yaxşılaşdırılması üçün gördüyü humanist tədbirlərdən söhbət açıb. O, yazdığı “Xan qızı” poemasından bir parçanı söyləyib.