San Dieqo Kaliforniya Universitetinin tədqiqatçıları müəyyən ediblər ki, uzunömürlülük genləri müntəzəm fiziki fəaliyyət olmadan işləməyə bilər və belə genləri olmayan insanlar idman etməklə daha uzun yaşaya bilərlər.

"Tehsil.biz"in xarici KİV-ə istinadən məlumatına görə, əvvəlki araşdırmalar göstərib ki, aşağı fiziki aktivlik və uzun müddət oturmaq daha yüksək ölüm riski ilə əlaqələndirilir. Ancaq bir insanın uzun ömürlə əlaqəli müəyyən gen variantları varsa, riskin dəyişib-dəyişmədiyi bəlli deyildi.

2012-ci ildə Qadın Sağlamlığı Təşəbbüsünün Fiziki Fəaliyyət və Ürək-Damar Sağlamlığının Obyektiv Tədqiqatı (OPACH) 63 yaş və yuxarı yaşlı 5446 ABŞ qadınının fiziki fəaliyyətini ölçməyə başladı. İştirakçılar hərəkətdə nə qədər vaxt keçirdiklərini, fiziki fəaliyyətlərinin intensivliyini və oturarkən sərf etdikləri vaxtı ölçmək üçün yeddi günə qədər xüsusi pedometr taxdılar.

Müşahidə 2020-ci ildə başa çatıb. Məlum oldu ki, uzun müddət orta və güclü məşq aşağı ölüm riski ilə əlaqələndirilir. Oturaq həyat tərzi iştirakçıların yaşından və uzunömürlülük üçün genetik meylindən asılı olmayaraq, ölüm riskini artırıb.