Türkiyənin Ankara Universitetinin professoru, ifratkeçiricilik sahəsində dünyada tanınmış alimlərdən olan Əli Gəncər Bakı Dövlət Universitetinin (BDU) Fizika fakültəsində “Dayanıqlı inkişafda elm və texnologiyaların rolu” mövzusunda mühazirə oxuyub.

Tehsil.biz xəbər verir ki, professor Əli Gəncər müasir dövrdə ölkələrin iqtisadi inkişafında, yüksək həyat səviyyəsinin əldə olunmasında texnologiyaların rolu və aktual problemləri barədə tədbir iştirakçılarına ətraflı məlumat verib. Bildirib ki, elm, təhsil və iqtisadiyyatı əhatə edən sistemli siyasət hər bir ölkənin davamlı və dayanıqlı inkişafının başlıca təminatçısıdır. Elm və texnologiyaların ölkələrin sosial rifah və davamlı inkişafında çox mühüm rolu var. Əli Gəncər texnologiyaların daha çox inkişaf etdiyi ölkələrdə insanların orta ömür yaşının da yüksək olduğunu son 150 ilin statistik məlumatlarının təhlili əsasında göstərib. Əli Gəncər bu istiqamətdə Türkiyə və Azərbaycanda həyata keçirilən və görülməli olan işlər barədə də fikirlərini bölüşüb.

Sonra məruzə ətrafında müzakirələr aparılıb, suallar cavablandırılıb.